Будаўнік – прафесія мірная
Будаўнічых прафесій вельмі шмат. Ствараюць планы забудоў архітэктары, праекты дамоў і іншых пабудоў — праекціроўшчыкі; сцены ўзводзяць муляры; унутранай аддзелкай займаюцца дызайнеры, цесляры, на будаўнічай тэхніцы працуюць кранаўшчыкі, вадзіцелі.
Існуе цэлы шэраг рабочых спецыяльнасцей, такіх як арматуршчык, бетоншчык, страхар, маляр, мантажнік, абліцоўшчык, тынкоўшчык і іншыя. Адказнасць за якасць работ ляжыць на плячах усіх будаўнікоў. І калі яны справу сваю выконваюць з душой, то і працаваць, і жыць у такіх будынках прыемна і ўтульна. Як кажуць самі будаўнікі, прафесія ў іх хоць і складаная, але высакародная. Гэтыя людзі любяць сваю справу, імкнуцца да станоўчых рэзультатаў, каб аднойчы пабачыць, як дзякуючы агульным намаганням у новы дом з радасцю засяляюцца людзі.
На завулку Садовым у райцэнтры ўзведзеная пад дах пяціпавярхоўка з кожным днём набывае новае аблічча. Цагляная кладка хаваецца за уцяпляльнік і пакрываецца слоем тынку. На аддзелцы фасада занятыя вопытныя будаўнікі Дзмітрый Анатольевіч КАЛЕСНІК і Георгій Іванавіч АРХІПАЎ.
Дылетанту здаецца: што тут асаблівага? Бяры раствор, кідай яго на паверхню і разгладжвай як мага раўней. На самой жа справе, каб фасад атрымаўся прыгожы, роўны і гладкі, тынкоўшчыкі прыкладаюць шмат намаганняў. Вялікае значэнне маюць не толькі рукі майстра, а і прыстасаванні, тыя ж кельмы, шпаталі, цёркі і таму падобнае. Назіраць за тым, як у будаўнічай «люльцы» на вышыні 5-га паверха працуюць мужчыны, адно задавальненне. Рухі вывераныя, размашыстыя. Яны зладжана і акуратна тынкуюць дом, бо разумеюць, што менавіта ад іх уменняў і майстэрства залежыць, наколькі дасканалымі, акуратнымі і незаўважнымі будуць швы і наколькі прыгожым будзе знешні выгляд усяго будынка пасля таго, як маляры пафарбуюць яго.
— Працаваць нялёгка, — дзеліцца Дзмітрый Анатольевіч, — але я прывык, не ўяўляю ўжо іншага занятку. Ды і прыемна ўсведамляць, што да гэтага жылога дома і я прыклаў свае рукі. Раней у Расію ездзіў, каб зарабіць, а цяпер дома чакаюць 3-гадовая дачушка Васіліса і жонка Святлана.
— А ці радуюць заробкі ?
—Заробкі, канешне, хацелася б мець большыя, за такую цяжкую працу ў спякоту, але для нашай мясцовасці і тое, што атрымліваем, ня-дрэнна, — з разуменнем, у адзін голас адказваюць мужчыны.
Георгій Іванавіч па прафесіі муляр, а калі ёсць вытворчая неабходнасць, то і з прафесіяй тынкоўшчыка выдатна спраўляецца. Ён, як і яго напарнік, пабудаваў дом, пасадзіў сад, даў адукацыю дачцэ і сыну, а цяпер разам з жонкай Марынай цешыцца маленькай унучкай Лерай. А мы з вамі, шаноўныя чытачы, цяпер ведаем, як гаворыцца, асабіста людзей, якія апрацоўваюць фасад новабудоўлі.
Мікалай Васільевіч ПАДРАБІНКІН, начальнік ДУК ДБП «Клічаўская ПМК – 258»:
— Наша ПМК-258, як і многія прадпрыемствы ў будаўнічай сферы, перажывае не лепшы час. Шматлюдная ў мінулыя гады арганізацыя на сённяшні дзень налічвае крыху больш за 70 чалавек. Але, нягле-дзячы ні на што, будаўнікі перасоўнай механізаванай калоны працуюць сумленна і аддана. Цяпер наш галоўны будаўнічы аб’ект – 5-павярховы 20-кватэрны жылы дом.
Усе кватэры восенню плануем здаць пад ключ. У дадзены момант выконваем аддзелачныя работы на другім паверсе і на фасадзе. Пасля здачы аб’екта будзем дапамагаць калегам з Кіраўска завяршаць будаўніцтва такога ж шматкватэрнага дома.
Яшчэ мы рыхтуем да перадачы камунгасу інтэрнат па вуліцы Сацыялістычнай. Гэтым летам падрыхтавалі неабходную дакументацыю, адрамантавалі дах, замянілі электрашчытавыя і часткова электраправодку, устанаўліваем шклопакеты на лесвічных пляцоўках.
З нагоды прафесійнага свята віншую калектыў, нашых шаноўных ветэранаў з Днём будаўніка! Усе вы звязалі свой лёс з будаўнічай справай, валодаеце і неабходнымі ведамі, і прафесійнымі навыкамі. Вы – людзі працавітыя, уважлівыя, акуратныя, настойлівыя. Жадаю ўсім здароўя моцнага, сямейнага дабрабыту, поспеху ва ўсіх справах.
Будоўля ў пераважнай большасці грамадзян заўсёды асацыіруецца з цяжкімі ўмовамі працы, граззю, цэментам, фарбай. Таму паняцці «жанчына» і «будоўля» даволі цяжка сумяшчальныя, але гэта толькі на першы погляд. На самой справе вельмі шмат прадстаўніц лепшай паловы чалавецтва выбіраюць мужчынскую справу і на «выдатна» асвойваюць будаўнічыя прафесіі. Яны, трапіўшы ў суровую, чыста мужчынскую рэчаіснасць, стараюцца не толькі спраўляцца з цяжкімі паўсядзённымі нагрузкамі, а і ладзіць з мужчынамі, не ўступаць ім у прафесіяналізме, а часам і пераўзыходзіць іх.
Перш чым зрабіць здымак, зазірнула ў суседні пакой, дзе напярэдадні папрацавалі аддзелачніцы. Столі ў будучай кватэры пашпакляваны проста ідэальна, хаця, аказваецца, яшчэ не пускалі ў справу шліфавальную машынку. Так тонка і акуратна выконваюць работу прыгожыя і абаяльныя Ганна Арлова, Ірына Лебедзева, Вольга Нятрэба, Юлія Арцёмава. Дарэчы, усе яны пры макіяжы, з добрым настроем, працуюць дружна і зладжана. Са святам вас, чароўныя будаўнікі! Здароўя, аптымізму, дабра вам і вашым родным!
Аліна СУДНІК.
Фота аўтара.