СЛОВА ГАВАРКОЕ, ВАБКАЕ, ЖЫВОЕ…
Не так даўно ў ДУА “Пярэкальская сярэдняя школа” адбылася сустрэча навучэнцаў з беларускай пісьменніцай, членам Саюза пісьменнікаў Беларусі Лёляй Багдановіч і мясцовай паэтэсай Таццянай Чэрап.
Усе мы чакалі і рыхтаваліся да гэтай сустрэчы. І вось час прыйшоў. На гадзіне зносін у школьнай актавай зале творцы расказалі аб сваім жыццёвым і творчым шляху. Так, Лёля Уладзіміраўна Багдановіч нарадзілася ў вёсцы Градзянка, што на Асіпоўшчыне. Зараз яна жыве ў Барысаве, з’яўляецца старшынёй літаратурнага аб’яднання “Натхненне”, членам Саюза пісьменнікаў Беларусі. Друкуецца ў часопісах “Маладосць”, “Вясёлка”, “ЛіМ”, “Гаспадыня”, “Алеся” і інш. У 2013 годзе выйшаў зборнік яе вершаў “Зорны кошык”. Падчас сустрэчы з вуснаў пісьменніцы мы пачулі вершы, якія яна прысвя-ціла сваёй маці: “Аб маці”, “Мамін голас”, “Галубка” (балада аб маці), гумарыстычныя вершы і вершы пра каханне. У выкананні нашай госці прагучалі і яе аўтарскія песні “Пьяная копна” і “На крыльях мечты”.
Вучні ж трэцяга, пятага і шостага класаў падрыхтавалі выставу малюнкаў “У свеце казак”, якую прысвяцілі казкам Лёлі Багдановіч.
Прыемна ўразіла пісьменніцу інсцэніроўка яе казкі “Як добра быць патрэбным!”, якую падрыхтавалі вучні 3-га класа. У казцы распавядаецца пра новенькі бліскучы каляндарык, які ніхто не хацеў набываць у кіёску. Гаспадыня кіёска ўжо не ведала, што з ім рабіць, але ўсё ж такі каляндарык знайшоў сваё месца ў хаце добрай бабулі, якая ўжо шмат кіёскаў абышла, а патрэбнай ёй рэчы (календара) не знайшла. Ролю каляндарыка ў ісцэніроўцы выканаў Яўген Карачун, гаспадыні кіёска – Аляксандра Дэцык, бабулі – Настасся Дрозд .
У час мерапрыемства вучні прадэкламавалі розныя вершы пісьменніцы.
Таццяна Дзмітрыеўна Чэрап — мясцовая паэтэса. Прыехала яна ў Арэхаўку са Жлобіна. Дваццаць гадоў працавала настаўніцай пачатковых класаў у нашай школе. Пісаць вершы пачала позна, у 37 гадоў, выключна на рускай мове. Аўтар прачытала для нас розныя свае вершы. І вучні таксама з задавальненнем прачыталі яе паэтычныя творы.
Пад канец творчай сустрэчы ўсе жадаючыя атрымалі аўтографы і сфатаграфаваліся з пісьменніцамі на памяць.
Будзем спадзявацца, што гэта была не апошняя сустрэча з майстрамі слова ў нашай школе і яшчэ не раз мы будзем мець магчымасць знаёмства з іх натхняльнымі і глыбокімі творамі.
Наталля ЛАПАЦІНА,
настаўніца беларускай мовы і літаратуры Пярэкальскай СШ.