Гран-пры конкурсу – у клічаўлянкі Дар’і Акуліч
З ІІІ-га адкрытага рэгіянальнага фестывалю-конкурсу дзіцячага мастацтва “ЛьВенок” (Лідскі вянок), што традыцыйна праходзіць у горадзе Лідзе, выхаванка дзіцячай школы мастацтваў горада Клічава Дар’я Акуліч вярнулася з галоўнай яго ўзнагародай – Гран-пры, бо пры-знана прафесійным журы абсалютнай перамажцай у намінацыі “Духавыя і ўдарныя інструменты” (яе інструменты – ксілафон і малы барабан).
Такі поспех сваёй вучаніцы Руслан Леанідавіч Хрыставы, у якога дзяўчынка па класе ўдарных інструментаў займаецца ўжо амаль тры гады, лічыць заканамерным. Даша не толькі адораная, але і вельмі ўседлівая, працавітая, што не менш важна. Яна ўжо і раней важка заяўляла аб сабе на іншых конкурсах. Напрыклад, летась іх дуэт з Ула-дзіславам Комарам заняў 3-е месца ў абласным конкурсе інструментальных ансамбляў. І вось цяпер узята новая вышыня! У 9 гадоў стаць адной з лепшых сярод юных дараванняў з Мінска, Гродна, Ліды, Баранавіч, Наваполацка і многіх іншых буйных і малых гарадоў (Магілёўшчыну прадстаўлялі юныя музыканты з Кіраўска, Клічава, Бабруйска) – пагадзіцеся, сапраўды поспех!
Узнагародай Дар’і былі і Гран-пры, і сімвал конкурсу – вялізная мяккая цацка – ільвяня, і медаль. Няхай і не такі, як у яе таты, Сяргея Віктаравіча Акуліча, станочніка ДЛГУ “Клічаўскі лясгас”, знакамітага лыжніка, які ў сёлетнім лютым заваяваў “золата” на 45-х Еўрапейскіх лясных лыжных гонках у Харваціі. Але гэты ўклад у сямейную скарбонку малодшай дачкі для бацькоў – вялікая радасць, надзея на будучыню.
Перамога ў “Лідскім вянку” – працяг эстафеты добрых спраў настаўнікаў і выхаванцаў дзіцячай школы мастацтваў горада Клічава. Пацвярджэнне таму – не толькі вышэйшая ўзнагарода конкурсу пераможцы, але і яшчэ адразу тры граматы! Граматай конкурсу адзначана сама гэта ўстанова, якую вось 12 гадоў узначальвае Уладзімір Мікалаевіч Суравец. Граматамі конкурсу ўзнагароджаны і настаўнікі, якія падрыхтавалі лаўрэата фестывалю: Руслан Леанідавіч Хрыставы – за высокае педагагічнае майстэрства, Юлія Дзмітрыеўна Вароніч – за высокае канцэртмайстарскае майстэрства. Вось гэта па-клічаўску! Сапраўды, ведай нашых! Віншуем з поспехам і новых творчых здабыткаў!
Н. Мікалаева.
На здымку: (злева направа) Дар,я АКУЛІЧ, Р. Л. ХРЫСТАВЫ, Ю. Дз. ВАРОНІЧ.