Лес пачынаецца з шышкі

У Клічаўскім лясгасе працягваецца сезон нарыхтоўкі шышак. Як расказала Яна ГОМАН, інжынер па лесааднаўленні лясгаса, сёлета мясцовым лесаводам патрэбна сабраць 250 кілаграмаў шышак елкі еўрапейскай, прычым толькі якаснага насеннага матэрыялу, які б адпавядаў устаноўленым крытэрыям. Гэта невялікі аб’ём, бо ў лясгасе ў папярэднія гады створаны надзейны запас насення дрэў хвойных пародаў. Сёння больш актыўна ідзе нарыхтоўка шышак елкі ў Бацэвіцкім і Ганчанскім лясніцтвах.

Шышкі сасны і елкі штогод збіраюцца і пастаўляюцца на перапрацоўку ў Горацкі лясгас, дзе ёсць цэх па перапрацоўцы лесанасеннай сыравіны. Там жа насенне і захоўваецца. Пасля з яго ў пастаянным лясным гадавальніку лясгаса будуць вырашчаны сеянцы і саджанцы, якія перасадзяць у лес.

Ад дзяцей – пажылым людзям

Па ініцыятыве кіраўніка дзяржавы, агучанай пад час дабрачыннага свята, прысвечанага акцыі «Нашы дзеці», у Беларусі з 3 па 14 студзеня праходзіць рэспубліканская дабрачынная акцыя для пажылых людзей «Ад усёй душы». Яе арганізатары – Міністэрства працы і сацыяльнай абароны і Міністэрства адукацыі сумесна з ГА «Беларускі рэспубліканскі саюз моладзі».

Шэраг мерапрыемстваў праходзіць і на Клічаўшчыне. Клопат і ўвагу аб сабе ад дзяцей і моладзі, кіраўнікоў мясцовых органаў улады і розных арганізацый, дэпутатаў адчуваюць прадстаўнікі старэйшага пакалення. У мінулым нумары наша газета расказвала аб такой вялікай, цёплай 

сустрэчы з насельнікамі Дома ветэранаў. 

Як паведаміла Алеся БАРАЗНА, загадчык аддзялення РЦСАН, без увагі не засталіся і клічаўляне, і вяскоўцы. Так, вучні Пярэкальскай, Нясяцкай і Максімавіцкай сярэдніх школ наведалі сваіх аднавяскоўцаў на даму, павіншавалі са святамі і падарылі ім «Калядныя паштоўкі», што зрабілі сваімі рукамі. 

Вучні ж Пярэкальскай школы на гэтым не спыніліся, а наведаліся да пажылых і адзінокіх людзей, каб прынесці ім дроў, вады з калодзежа. Вось такая дзейсная ўвага!

Валанцёрскі атрад «Добрае сэрца» гарадской СШ №2 у чарговы раз наведаўся да сваго сябра, ветэрана педагагічнай працы, каб дапамагчы па гаспадарцы, снег пачысціць і прыўзняць настрой сваімі сувенірамі.

Пажылыя кажуць: «Дзякуй!». Акцыя ж працягваецца, далучыцца да гэтай добрай ініцыятывы могуць усе жадаючыя.

Адзначаем святы разам!

Прэм’ера мюзікла «Снежная каралева» стала ў гэтыя навагоднія свядочныя дні цудоўным падарункам для клічаўлян і гасцей горада ад творчага калектыву раённага Дома культуры. Дарэчы, новы мюзікл па просьбе гледачоў на сцэне РДК давалі двойчы!

7 снежня ў раённым Доме культуры адбыўся святочны канцэрт «Рождества волшебные мгновения». Са святам Нараджэння Хрыстова юных і сталых клічаўлян павіншаваў Сергій АНДРЭЕЎ, пратаіерэй, настаяцель Свята-Дабраве­шчанскага храма. А маленькім клічаўлянам прызначаліся яшчэ і салодкасці. 

Радасць, цяпло, дабрыню сваёй музыкай, песнямі, танцамі падарылі гледачам юныя таленты дзіцячай школы мастацтваў г. Клічава, самадзейныя артысты раённага Дома культуры, Заслужаны аматарскі калектыў Рэспублікі Беларусь ансамбль народнай музыкі і песні «Жытніца» Арэхаўскага СДК. 

У фае ж РДК працавалі тэматычныя выстаўкі, што арганізавалі дзіцячая школа мастацтваў, раённы Дом рамёстваў, цэнтральная бібліятэка. Яны таксама знайшлі сваіх аматараў.

Мерапрыемства пакінула ў душы ўзнёсласць, а яшчэ – веру ў цуды!