У раёне
Нашы дзеці
На Клічаўшчыне працягваецца традыцыйная навагодняя дабрачынная акцыя «Нашы дзеці».
Учора ў ДУА «Клічаўскі цэнтр карэкцыйна-развіваючага навучання і рэабілітацыі» царыла сапраўдная святочная атмасфера. У рамках акцыі «Нашы дзеці» да выхаванцаў прыйшла ў госці, ды яшчэ з падарункамі, старшыня раённай арганізацыі Беларускага Чырвонага Крыжа Наталля ЛЮБЕЦКАЯ. А выхаванцы ДУДА «Цэнтр дадатковай адукацыі дзяцей і моладзі» падрыхтавалі для рабят тэатралізаванае прадстаўленне.
Марафон дабрачыннасці працягнецца. У госці да дзетак, што выхоўваюцца ў дзіцячым доме сямейнага тыпу Захара КУНДЗІКАВА, прыедзе з падарункамі Алег ПОРТНІК, дырэктар УКСП «Саўгас «ДАБРАВОЛЕЦ».
Плануецца, што 30 снежня навагодняе свята будзе арганізавана ў ДУА «Клічаўскі раённы сацыяльна-педагагічны цэнтр» (дзіцячы сацыяльны прытулак). У госці да дзяцей прыйдзе не толькі Дзядуля Мароз разам з Снягурачкай і казачнымі героямі, але і завітаюць госці – Віталь ПАЛАМАРЧУК, начальнік участка Клічаўскага вузла электрасувязі і Сяргей ГРАШЫЛАЎ, старшыня
раённага аб’яднання прафсаюзаў.
У пераднавагоддзі ўстанова «Магілёўскае абласное ўпраўленне МНС Рэспублікі Беларусь», начальнік якога Сяргей ДЗЯМІДАЎ, падарыла для выхаванцаў дзіцячага дома сямейнага тыпу Рыты
КУНДЗІКАВАЙ не толькі падарункі салодкасцей, але і экскурсію ў Нясвіжскі замак.
Рознічны гандаль ад Клічаўскага лясгаса
Сёння Клічаўскі лясгас будуе ўласную гандлёвую пляцоўку ў горадзе Магілёве (у раёне абласной бальніцы).
Як паведаміла намеснік кіраўніка па ідэалагічнай рабоце Святлана ЧАРЭЙЧЫК, на новым гандлёвым аб’екце лясгас будзе прапаноўваць кліентам вялікі асартымент тавараў: дровы, пелеты, піламатэрыялы натуральнай вільготнасці і ў сухім выглядзе, дошку для падлогі, імітацыю бруса, блок-хаус, вагонку і іншыя матэрыялы. Клічаўляне прадставяць пакупнікам і пасадачны матэрыял дэкаратыўных дрэў і кустоў з пастаяннага ляснога гадавальніка лясгаса.
Дарэчы, такія гандлёвыя пляцоўкі лясгасаў абсталёўваюцца ва ўсіх абласных цэнтрах па тыпавым праекце і адзінаму брэндбуку. У Магілёўскім ДВЛГА гэта важная справа даручана Клічаўскаму лясгасу. Мэта – задавальненне попыту насельніцтва ў прадукцыі з драўніны і атрыманне прыбытку. Гэта адно з выйсцяў у сённяшняй эканамічнай дзейнасці лясной галіны краіны ва ўмовах заходніх эканамічных санкцый.
Сагрэем дзіцячыя сэрцы
Педагогі з усіх устаноў аддзела па адукацыі райвыканкама, як гарадскіх, так і сельскіх, па добрай традыцыі прымаюць актыўны ўдзел у сёлетнім 11-ым абласным дабрачынным марафоне «Сагрэем дзіцячыя сэрцы». Ён пачаўся 1 снежня і працягнецца да 31 студзеня. Ужо зараз педагогі раёна аказалі матэрыяльную дапамогу дзецям-сіротам, дзецям, якія знаходзяцца пад апекай, хворым дзецям з малазабяспечаных і шмадзетных сем’яў, пералічыўшы на рахунак Магілёўскага аддзялення
РГА «Беларускі дзіцячы фонд» 1000 рублёў.
Зрабіць ахвяраванні проста, праз сістэму «РАЗЛІК» або набраўшы па тэлефоне неабходныя нумары з хатняга або мабільнага тэлефона, пасля чаго з вашага рахунку будуць спісаны невялічкія грошы, ад 2-3 рублёў. Але разам гэта будуць ужо важкія сродкі для дзяцей. У Беларусі ж здаўна ўсе праблемы вырашалі грамадой.