Хутка ў поле

Да пачатку веснавой сяўбы засталося каля месяца. І зараз адна з надзённых задач ва ўсіх сельгаспрадпрыемствах раёна – падрыхтоўка тэхнікі да новага сезона. Таму ў рамонтных майстэрнях паўсямесна кіпіць работа.

Як расказаў намеснік начальніка ўпраўлення па сельскай гаспадарцы і харчаванні райвыканкама Сяргей ЛАПКО, задача аграрыяў – да 1 сакавіка вывесці на лінейку гатоўнасці 95% энерганасычаных трактароў і пасяўных агрэгатаў (культыватары, плугі, бароны, раскідвальнікі арганічных і мінеральных угнаенняў, дыскатары і іншае), а ўсяго –
17 відаў тэхнікі. 

Асаблівых цяжкасцяў з арганізацыяй рамонту ў сельгаспрадпрыемствах няма. Неабходныя запчасткі набываюцца цэнтралізавана па дагаварах з ААТ «Задняпроўскі міжрайаграсэрвіс». Моцныя ж гаспадаркі, такія як УКСП «Саўгас «ДАБРАВОЛЕЦ» і ААТ «Максімавічы-Агра», купляюць неабходныя запчасткі для правядзення рамонту тэхнікі самі. У гэтых гаспадарках ёсць нямала імпартнай сельскагаспадарчай тэхнікі, таму зараней праведзены тэндары на закупку такіх запчастак. 

Па стане на раніцу 27 лютага ў раёне ўжо падрыхтавана да сяўбы каля 92% энерганасычаных трактароў і 80% пасяўных агрэгатаў.

Ёсць дзеці – ёсць будучыня

2252 чалавекі пражываюць сёння на тэрыторыі Нясяцкага сельскага Савета. У склад яго ўваходзяць 30 населеных пунктаў, самыя буйныя – аграгарадкі Арэхаўка і Нясята, у якіх адпаведна насельніцтва складае па 909 і 580 чалавек. На тэрыторыі сель­савета знаходзяцца УКСП «Саўгас «ДАБРАВОЛЕЦ» і ААТ «Нясята-Агра», дзейнічае шмат устаноў сацкультбыта, таму людзям ёсць дзе працаваць, ёсць умовы гадаваць і вучыць дзяцей.

Толькі за мінулы год на тэрыторыі сельсавета нарадзіліся 18 немаўлят, прычым аднолькава, па сямёра, – у а/г. Арэхаўка і Нясята. Увогуле, бусел, што прыносіць дзетак, не забываецца наведвацца ў мясцовыя сем’і. Зараз у сельсавеце жыве 28 шматдзетных сем’яў, у якіх выхоўваецца амаль 100 дзяцей. Дарэчы, самая вялікая сям’я – з вёскі Пярэкаль, у якой бацькі Наталлля і Віталь МАЛАШКЕВІЧ выхоўваюць 10 дзяцей ва ўзросце да 18 гадоў. 

Шматдзетныя сем’і атрымліваюць адчувальную падтрымку дзяржавы, у тым ліку і ў забеспячэнні жыллём. Зараз 12 мясцовых шматдзетных сем’яў стаяць на ўліку на паляпшэнне жыллёвых умоў. Летась жа кватэру ў Клічаве з дзяржпадтрымкай атрымала шматдзетная сям’я Алены МАЛІНЫ, жывёлавода УКСП «Саўгас «ДАБРАВОЛЕЦ».

Выхоўваць патрыётаў

Адна з самых ганаровых прафесій – абараняць Айчыну. Яе спасцігаюць сёння і кадзеты, сярод якіх ёсць і юнакі з Клічаўскага раёна. Яны – прыклад для многіх нашых дзяцей. Напярэдадні Дня абаронца Айчыны навучэнцы 5-9 класаў Бацэвіцкай сярэдняй школы разам з педагогам Ірынай ГАЛАЦЭВІЧ наведалі Магілёўскае абласное кадзецкае вучылішча. Дзеці пазнаёміліся з гісторыяй стварэння ўстановы, паглядзелі ўмовы, ў якіх жывуць і вучацца, займаюцца практычна кадзеты. Асаблівыя ўражанні атрымалі ад наведвання інтэрактыўнага ціра, дзе пазнаёміліся са стралковай зброяй. Капітан С.І. АЛДАШАЎ, кіраўнік абласнога цэнтра патрыятычнага выхавання, правёў з рабятамі практычныя заняткі па зборцы і разборцы зброі. А яшчэ кожны навучэнец паспрабаваў сябе ў вучэбнай стральбе. Ужо едучы дадому, дзеці дзяліліся ўражанннямі, а некаторыя нават задумаліся і аб паступленні. Так, лепш адзін раз пабачыць, чым шмат пачуць.

Тэкст: Ніна ІЗОХ