У  пятніцу  ў  раённым  Доме  культуры  стартаваў  V  рэгіянальны  фестываль  “Залатая  мелодыя ”.
Да  нас  у  госці  завіталі  самадзейныя  артысты  Крупскага  раёна  Мінскай  вобласці,  Бялыніцкага  і  Круглянскага  раёнаў  Магілёўшчыны.  Адкрываючы V  рэгіянальны  фестываль “ Залатая  мелодыя”,  намеснік  старшыні  райвыканкама  Галіна  Пятроўна  Данілкіна  падкрэсліла  важнасць  і  неабходнасць  песеннай  спадчыны,  адзначыла,  які  ўплыў  на  культуру  кожнага  народа  аказваюць  добрая  музыка  і  песні,  якія    нам  “будаваць  і  жыць  дапамагаюць”.  Галіна  Пятроўна  пажадала  артыстам  поспехаў  і  творчага  натхнення,  гледачам – прыемных  ураджанняў  і  добрага  настрою.
Вядучыя  конкурснай  праграмы  Лізавета  Кавалёва,  Вікторыя  Харкова  і  Аляксей  Шумскі  разам  з  удзельнікамі  канцэрта  пастараліся,  каб  ніхто  не  сумаваў  і  канцэрт  прайшоў  на  адным  дыханні.  Добразычлівыя  гледачы  шчыра  віталі артыстаў,  дарылі  ім  сваю  прыхільнасць,  шквал  апладысментаў  і  выбіралі  лепшага,  на  іх  думку,  саліста  ці  ансамбль.
Акрамя  глядацкага,  працавала  і  прафесійнае  журы,  у  складзе  якога  А. М. Ваакс,  кіраўнік  заслужанага  аматарскага  калектыву  Рэспублікі  Беларусь, ансамбля  народнай  песні  і  музыкі  “ Жытніца” Арэхаўскага  СДК,  В. М. Ленькова,  кіраўнік  узорнага  ансамбля  “Ра-сінка” ДУА “Шматпрофільны  цэнтр  “Ветразь”  горада  Бялынічы,  Н. Ф. Кажамяка,  галоўны  спецыяліст  аддзела  культуры  горада  Крупкі, Г. М. Блізнякова,  дырэктар  РДК  г.  Круглае.
Наш  раён  на  конкурсе  прадставілі:  вакальны  ансамбль  РДК  “Мелодыя”,  вакалісткі  Марыя  Дулебенец,  настаўніца  дзіцячай  школы  мастацтваў  г. Клічава,  і 10-гадовая  Крысціна  Баранава.  Юная  зорачка  выканала  песню  Уладзіміра  Мулявіна  на  словы  Янкі  Купалы  “Малітва”,  і  гэта ў  праграме  канцэрта  быў  адзіны  шлягер  беларускіх  аўтараў  на  роднай  мове.
Нашы  госці  парадавалі  стракатай  навізной  канцэртных  касцюмаў  і  рэжысурай  асобных    нумараў.
У. Г. Ваакс,  начальнік  аддзела  культуры  райвыканкама,  падзякаваў  удзельнікам  канцэрта  за  дастаўленую  гледачам  радасць,  уручыў  гасцям  кветкі  і  сувеніры,  перадаў  эстафету  Круглянскаму  раёну.
Пажадаем  фестывалю  доўгага  веку,  а  нашым  землякам – поспеху,  творчага  натхнення,  такіх  жа  ўдзячных  гледачоў  і,  канешне ж,  перамогі  ў  конкурсе.

Аліна  Суднік.