На школьным базары
Крыху больш месяца да пачатку заняткаў у школе, а бацькі ўжо “акунуліся” ў школьныя базары. Для многіх сямей гэта выпрабаванне для кашалька, бо цэны “кусаюцца”.
Магазіны райпа прапануюць тавары розных айчынных вытворцаў, таму кожны падбірае
пакупку на свой густ і па кішэні.
Тыдзень на вуліцы, каля ўваходу ў магазін “Дзіцячы свет” у Клічаве, разгорнуты школьны базар. Тавары завозяцца амаль штодня, таму і пакупнікі тут тоўпяцца.
Шырокі асартымент абутку (не толькі школьнага) у аддзеле “Абутак” універмага, дзе прадстаўлена прадукцыя беларускіх фабрык ААТ “Сівельга”, «Нёман”, “Марка” і іншых.
У “Дзіцячым свеце” і на школьным базары сёння ў продажы ў асартыменце школьна- пісьмовыя прыналежнасці, ранцы, сарочкі, школьныя касцюмы для хлапчукоў і дзяўчынак, а яшчэ для школьніц спаднічкі, блузкі, сарафаны. Ёсць бялізнавы трыкатаж, спартыўная форма і многае іншае.
Школьная форма пастаўлена таксама ў сельскія магазіны прамысловых тавараў, а школьна-пісьмовыя прыналежнасці (сшыткі, альбомы, алоўкі, дзённікі і г. д.) – ва ўсе магазіны паўсядзённага попыту сістэмы раённай спажывецкай кааперацыі.
Рэкламы не патрэбна, бо людзі выбіраюць якаснае – значыць, беларускае.
Юлія Лашко (Ясева) разам са сваёй сям’ёй прыехала ў Клічаў у госці да бацькоў з Амерыкі. Міма школьнага базару з дочкамі не прайшлі. Мо прыглядзяць што на памяць старэйшай, Палінцы, сёлета ж яна пойдзе ў першы клас, а меньшай, непаседзе Валерыі, усё цікава.
На школьным базары ў гэты дзень працавала паводле графіка ўнівермага прадавец магазіна “Мэбля” Таццяна Мурач.
Надзея Уладзіміраўна Дубень з Віркава, маці траіх дзяцей, пакупкамі для свайго малодшага
сына Аляксандра – ён сёлета ўжо васьмікласнік – задаволена: купіла ўсё, што планавала, і не занадта дорага.
Ніна ІЗОХ.