Пачаўшы   каціцца  па  нахіленай  плоскасці,  вельмі  цяжка  спыніцца.  Часам  проста  няма  магчымасці  ўсё  абдумаць,  зірнуць  на  сябе  збоку.  А  як  на  сябе  паглядзець  збоку?  Як  задумацца?  Для  гэтага  патрэбна  хаця  б  спыніцца,  а  ты  не  можаш,  бо  коцішся…
Толькі  год  працую  следчым,  але  і  за  гэты  час  ужо  пабачыла  нямала  людзей,  якія  страцілі  правільнае  ўяўленне  аб  маральных  каштоўнасцях,  вартасці  жыцця.  Шкада,  што  сярод  іх  нямала  жанчын,  прыкра,  што  адпраўным   пунктам  усіх  іх  бед  стаў  алкаголь,  жаданне  пажывіцца  за  чужы  кошт.  Такіх  людзей  у  народзе  здаўна  называюць  “нячыстымі  на  руку”.   Але  ж  лепш  вучыцца  на  чужых  памылках.  Магчыма,  наступныя  гісторыі  з  падобнымі   “сцэнарыямі”  паслужаць  камусьці  добрым  урокам.
… Клічаўлянцы  Таццяне  Крыванос  толькі  25  гадоў.  Яна  маці  чатырохгадовага сына,  які, на  жаль, выхоўваецца  ў  Доме  малюткі.  Неяк  у  чэрвені  мінулага  года  адбылося выпадковае,  ледзь  не  “рамантычнае”  знаёмства  гэтай   адзінокай  маладой  жанчыны  і  чалавека  ў  гадах,  пенсіянера  з  вёскі  Ваевічы.  Спачатку  яны  за  яго   кошт  шчодра  частаваліся  са  спіртным,  а  калі   мужчына   быў  ужо  ў  добрым  падпітку,  Таццяна   ўкрала  ў  яго  грошы.  За  такія  супрацьпраўныя  дзеянні  Т. А.  Крыванос  судом  раёна  была  прыгаворана  да  240  гадзін  грамадскіх  работ.
… Асабістае  жыццё  Галіны  Жураўскай  з  а/г.  Нясята  не  заладзі-лася.  Асаблівай  адукацыі  не  займела,  з  мужам  развялася,  апошнім  часам  нідзе  не  працавала.   Перабівалася  выпадковым  заробкам  ды  збірала  ўлетку  ягады.   Затое,   увабраўшыся ў  сталасць,  з  зайздросным  пастаянствам  (тройчы  за    апошні  няпоўны  дзясятак  гадоў)  трапляла  на  лаву  падсудных.   Да  яе  прымяняліся  розныя  меры  пакарання – ад  грамадскіх  работ   да  абмежавання  волі.  Але  Галіна  ніякіх  вывадаў,  па  ўсім  відаць,  не  робіць.  Мінулым  летам  яна  зноў  прадстала  перад  судом.  Прычына  ўсё  тая  ж –  жаданне  пажывіцца  за  кошт  іншага.  На  гэты  раз  ахвярай  зламысніцы  стаў  добра  знаёмы  мужчына-аднавясковец,  дарэчы,  яго  яна  і  раней  абкрадвала.  У адзін  з  ліпеньскіх  дзён, ведаючы,  дзе  ляжыць  ключ  ад  яго  дома,  жанчына  “разбагацела”  ў  жытле  Н.  на  розныя  харчы,  ды  яшчэ  і  грошай  трохі   “прыхапіла”.   Прычына  злачынства  – дужа   карцела  пахмя-ліцца!  “Святое”  жаданне  Жураўская  споўніла,  але  ж  пасля  прыйшлося  ёй  тры  месяцы  прасядзець  пад  арыштам.
… Любові  Кавалёвай  з  Залічынкі — 70  гадоў.  За  сваё  жыццё  зарабіла  важкі  “багаж”,  а  дакладней – аж  тры  судзімасці,  нават  пабывала  ў “месцах  не  вельмі  аддаленых”.  Але  ж,  відаць,  такія  ўрокі  ёй   не  на  карысць.  На  апошнюю  “справу” – крадзеж  з  дачнага  дома ў  вёсцы  Мілое — старая   ішла,  добра  падпіўшы.  Кулаком  разбіла  шыбу  ў  акне,  парэзалася.  Праз  акно  залезла  ў  хату.  Але  ж  алкаголь  зрабіў  сваю  справу:  жанчына  захацела   спаць.  Уляглася  на гаспадарскі  ложак  і  адпачыла.  Прачнуўшыся,  прыхапіла  розныя  чужыя  рэчы,  што  спадабаліся,  і  босая  (бо  дзе  схавала  ў  хаце  свой  абутак,  так  і  не  ўспомніла)  пашыбавала  дадому.  Дарэчы,  усё  ўкрадзенае  не  данесла,  бо  было  цяжка.  Кінула  ў  лесе,  думала  потым  неяк   забраць.   Ды  пасля  палічыла:  навошта  яно  ёй?  Праз  нейкі  час  да  яе  наведаліся  работнікі  міліцыі  і  гаспадар  дачы.  Дарэчы,  знайшліся  і  пантоплі  гора-“дамушніцы” – пад  падушкай  таго  гаспадарскага  ложка,  дзе  адпачывала.
Суд  раёна  вынес  Любові  Кавалёвай  абвінаваўчы прыгавор  без  назначэння  пакарання.
Што  агульнае  ў  гэтых  трох  справах?  Тое,  што  жанчыны  чыстасардэчна  раскаяліся  ва  ўчыненым,  добраахвотна  (часткова  ці  цалкам)  пакрылі  прычыненыя  страты,  актыўна  садзейнічалі  следству.  А  яшчэ  тое,  што  растрачваюць  самае  дарагое,  што  ёсць  у  кожнага, – жыццё,  так  нікчэмна.  Замест  таго,  каб  цаніць  кожнае  яго  імгненне,  радавацца  яму,  адпавядаць  высакароднай  місіі — быць  Жанчынай.

Марына  НІЗАВЕЦ,
следчы  следчага  аддзялення    раённага  аддзела
Следчага  камітэта.