Клічаўшчына – край лясоў

Мілажань, Новы Востраў, а/г. Стары Востраў. 10 гектараў маладога лесу пасаджана ў сёлетнім сакавіку ў Віркаўскім лясніцтве ў наваколлі гэтых населеных пунктаў. Паводле патрабаванняў Лясного кодэкса, новыя лясы – змешаныя, з сасны і бярозы. Крыху пазней на больш урадлівых глебах будуць пасаджаны яшчэ дуб і елка.
Паслугі па лесааднаўленні аказваюць індывідуальныя прадпрымальнікі з нашага раёна і г. Барысава, якія на тэрыторыі лясніцтва вядуць лесанарыхтоўку.

Прыемнае для сябе і ўсіх

А/г. КоЎбча. Сабе і людзям на задавальненне робіць добраўпарадкаванне грамадскага вадаёма жыхар Коўбчы Міхаіл Сяргеевіч Калеснік. Наводзячы парадак на сваёй сядзібе, ён узяў «пад патранат» і азярцо, што знаходзіцца побач з яго домам. Яшчэ ў мінулым годзе па яго просьбе падчысціць вадаём, пашырыць і паглыбіць яго дапамагла тэхніка адной клічаўскай арганізацыі, аб’ект якой быў побач. Затым Міхаіл Сяргеевіч высек усе зараснікі наўкол, навёў чысціню, парадак. А яшчэ зарыбіў возера карасямі, плоткамі, шчукамі і іншай рыбай, якую сам дзесьці і налавіў. Цяпер у мясцовай дзятвы ёсць месца цікавага адпачынку – рыбнай лоўлі.

Званне – пацвердзім!

А/г. Арэхаўка. Заслужаны аматарскі калектыў Рэспублікі Беларусь ансамбль народнай музыкі і песні «Жытніца» Арэхаўскага СДК у гэтыя дні рыхтуецца да важнай і адказнай па дзеі – пацвярджэння ганаровага звання. Паводле галіновых дакументаў, такая працэдура павінна праходзіць раз у 5 гадоў. Прымаць творчы «экзамен» працягласцю ў цэлую гадзіну будзе рэспубліканская камісія. Плануецца, што мерапрыемства пройдзе 17 красавіка ў раённым Доме культуры.
Зараз калектыў рыхтуе новую праграму «Гарэзлівы млын», у якой амаль палова – новыя творы, астатняе – лепшае з рэпертуару ў новай інтэрпрэтацыі.
У праграме «Жытніцы» прымуць удзел і выпускнікі дзіцячых школ мас тацтваў раёна.

Наводзіў парадак – зрабіў пажар

А/г. Нясята. Вясна на двары. Кожны гаспадар прыводзіць у парадак сваю сядзібу. Вось і жыхар Нясяты вырашыў знішчыць сухую расліннасць на сваім участку простым метадам – палам. Атрымалася зусім не так, як запланаваў. Вогненная стыхія разбушавалася так, што пашкоджана і агароджа суседа. Бяспечнасць чалавека прывяла да пажару, зараз ідзе праверка па факту.
З пачатку сезона ў раёне адбылося 12 узгаранняў сухой расліннасці, з іх 3 – за мінулыя выхадныя дні.

Ніна ІЗОХ