“Рана   ўставаць не  хочацца,  калі трэба  ісці  на ўрокі  ў  школу,  а  вось  у  суботу – зусім іншая  справа!” – так  сцвярджаюць  нясяцкія школьнікі  нездарма.
Бо шосты  школьны    дзень – гэта  цэлы свет!  Тут  і агульна-школьныя  акцыі, аб’яднанні  па інтарэсах,  спартыўныя секцыі,  факультатывы,  працоўныя  дэсанты,  пазакласныя  мерапрыемствы,  экскурсіі і  безліч усяго іншага.  Субота – гэта  дзень  цікавых  сустрэч, карысных  заняткаў,  дадатковая  магчымасць  для  паспяховага  развіцця  асобы.
Вось  і  нядаўна  вучняў  пачатковых  і  пятага  класаў   сабрала ў школе  спартыўнае  свята  “У гасцях  у казкі”.   Кожная з  дзвюх  камандаў  падрыхтавала    і  прадставіла  свае   прывітанне,   дэвіз і  эмблему.   А  затым  былі спартыўныя  эстафеты з   мноствам  гумарыстычных  конкурсаў,  гульняў,  у час  якіх  члены  кожнай  каманды  даказвалі, што  менавіта  яны – самыя  спрытныя, знаходлівыя,  кемлівыя,  дружныя.  Выпрабаванняў  было  нямала: са спартыўнымі абручамі  дзеці  перапраўляліся  праз “балота”, падцягваліся  на  жываце  на  лаўцы,  пралазілі  пад  бар’ерам,  спаборнічалі  на трапнасць  кідання  тэніснага  мяча, у  вялізных  гумавых  “ботах-скараходах”  пераадольвалі  на час  адлегласць,  прыгалі  напераганкі  ў  мяшках, з  завязанымі   вачамі  збіралі   параскіданыя   шышкі  і  г.д.
Свята  атрымалася  проста выдатным, яркім і захапляльным.   Аб  ім   з  вуснаў  некаторых   ўдзель-нікаў.
Чатырохкласнікі   Ксенія  Осіпава,  Мікалай  Ганчар,  Караліна  Коўрык, трэцякласнік  Мікіта  Грынюк:
– Свята   было  вясёлым.   Да  нас  у госці  завіталі  і  казачныя героі – Баба Яга,  Разбойнікі,  Царэўна Несмяяна  і  яе  дачка  царэўна Мілання.   Яга  і Разбойнікі  спачатку  нам  перашкаджалі ва ўсім, а  пасля  і  спаборнічалі  з  намі,  гулялі,  танцавалі  і спявалі.  Царэўна  ж  адразу  ўсё  плакала і  яе    было  ніяк  не  спыніць.  Але   мы  яе   развесялілі,  а затым  разам  і  спортам  займаліся,  і  ў  віктарыне  па  казках  удзельнічалі.
А  яшчэ  да  нас  у госці  прыходзілі  некаторыя   нашы  мамы    з  меншымі  братамі  і  сёстрамі.  Яны за  нас  хварэлі  ў  час  спаборніцтваў,  падтрымлівалі.
Хочам  сказаць  вялікае  дзякуй  настаўнікам  за такое  цудоўнае свята  ў  шосты школьны  дзень!

Ніна  ІЗОХ.