Да вяршынь – праз церні
30-31 студзеня ў Мінску адбыўся рэспубліканскі турнір 16-ці мацнейшых тэнісістаў Беларусі па настольным тэнісе сярод юнакоў і дзяўчат 2003 – 2004 гадоў нараджэння.
Як расказаў трэнер Клічаўскай ДЮСШ Юрый Чыжонак, у бой тут уступілі 16 спартсменаў (4 групы па 4 спартсмены ў кожнай) з розных абласцей Беларусі. Магілёўшчыну на ім прадстаўлялі па аднаму спартсмену з ДЮСШ гарадоў Магілёва і Бабруйска, а таксама юныя тэнісісты з Клічава Канстанцін Чыжонак і Аліна Радзюкевіч.
Задачы адразу былі пастаўлены сур’ёзныя: па выніках гульняў у сваіх падгрупах патрэбна заняць не ніжэй другога месца, каб патрапіць у васьмёрку мацнейшых і выйсці ў фінал. І Канстанцін, і Аліна занялі 1-я месцы ў сваіх падгрупах. Далей спаборніцтвы ў васьмёрках мацнейшых праходзілі па кругавой сістэме. І зноў нашы рабяты даказалі сваю грунтоўнасць.
Вынік рэспубліканскага турніру: Канстанцін Чыжонак заваяваў “бронзу”, узнагароджаны дыпломам ІІІ ступені Міністэрства спорту і турызму Рэспублікі Беларусь. Аліне Радзюкевіч не ха-піла аднаго кроку да прызавога месца, яна заняла 4-е месца. Але гэта таксама выдатны вынік. Цяпер абодва спартсмены займаюць лідзіруючыя пазіцыі па настольным тэнісе на Магілёўшчыне ў сваіх узроставых групах.
Яны ўвайшлі ў пяцёрку лепшых тэнісістаў гэтага рэспубліканскага турніру сярод юнакоў і дзяўчат і адразу былі запрошаны на зборы ў Цэнтр алімпійскай падрыхтоўкі па настольным тэнісе ў Мінску. Дарэчы, напрыканцы іх адбылося адкрытае першынство таварыства “Дынама”. У ім спаборнічалі і 30 тэнісістаў 2004 года нараджэння і маладзей. Канстанцін Чыжонак у гэтай узроставай падгрупе стаў бронзавым прызёрам.
Аб галоўным. Для Канстанціна Чыжонка, як прызёра рэспубліканскага турніру 16 мацнейшых тэнісістаў Беларусі, гэтыя спаборніцтвы маюць працяг. У красавіку адбудзецца асабісты чэмпіянат Рэспублікі Беларусь сярод тэнісістаў 2004 года нараджэння. Задача Канстанціна – выступіць тут гэтак жа рэзультатыўна, заняць не ніжэй другога месца. Дарога ў спорце цярністая, адолее ж яе той, хто ідзе.
Ніна Ізох.
На здымку: Аліна Радзюкевіч і Канстанцін Чыжонак з трэнерам Юрыем Чыжонкам.