ГАЛОЎНЫЯ ТЭМЫ – АДЗІНСТВА, ГІСТАРЫЧНАЯ ПАМЯЦЬ
Што ўяўляе сабой патрыятызм у сучаснасці, у журналістыцы і ў кожным канкрэтным журналісце? Адказы на гэта пытанне шукалі кіраўнікі інфармагенцтваў і тэлеканалаў рэспублікі і рэгіянальных сродкаў масавай інфармацыі ў час правядзення рэспубліканскай канферэнцыіі “Патрыятызм: гісторыя і сучаснасць”, у рабоце якой удзельнічалі першы намеснік кіраўніка Адміністрацыі Прэзідэнта Рэспублікі Беларусь Аляксандр Міхайлавіч Радзькоў, Міністр інфармацыі Лілія Станіславаўна Ананіч.
І вельмі сімвалічна, што прайшла яна ў сценах музея Вялікай Айчыннай вайны. Менавіта з экскурсіі па залах музея і пачалося мерапрыемства. Варта заўважыць, што літаральна з першых хвілін яна выклікала ў журналістаў самыя моцныя асацыяцыі і ўражанні. Праходзячы па залах музея, разумееш, што нам нельга згубіць гісторыю, сувязь пакаленняў, таму што без іх думаць і гаварыць аб патрыятызме немагчыма. Бо менавіта гісторыя нас некалі і аб’яднала.
У час пленарнага пасяджэння гучала шмат прапаноў, як палепшыць работу СМІ, ішла гаворка аб формах павелічэння падпісчыкаў, гледачоў, слухачоў і наведвальнікаў інтэрнэт-рэсурсаў. І ў гэтым сэнсе, на думку выступоўцаў, важна кансалідаваць беларускія медыя. Адна са спроб — стварэнне інтэрнэт-партала «СМІ Беларусі», які, дзякуючы дзяржаўнай падтрымцы, пачне сваю працу ў канцы гэтага года. На прасторы краін СНД такіх прыкладаў пакуль няма, няшмат аналагаў і ў свеце.
Намеснік дзяржаўнага сакратара Савета Бяспекі Беларусі Станіслаў ЗАСЬ, у сваю чаргу, распавёў журналістам пра супрацьстаянне ў сферы сэнсаў. «Гэта супрацьстаянне розных ідэалогій, маральных каштоўнасцей, культур і рэлі- гій, — патлумачыў ён. — Чаму я падымаю гэтую тэму? Таму што больш за ўсё фарміруюць гэтую сферу сродкі масавай інфармацыі, якія працуюць з людзьмі і ствараюць сэнсавы кантэкст усіх падзей. Зараз мы бачым шмат прыкладаў, калі спрабуюць пера-асэнсаваць некаторыя гістарычныя па-дзеі, а такія гістарычныя і ідэалагічныя вычварэнствы вельмі небяспечныя».
Начальнік ДУ “Ваеннае інфармацыйнае агенцтва Узброеных Сіл Беларусі “Ваяр” Андрэй Шубадзёраў выказаў думку аб тым, што ў патрыятычным выхаванні моладзі неабходна выкарыстоўваць сучасныя інфармацыйныя тэхналогіі, размаўляць з маладымі людзьмі на іх мове. На думку начальніка інфармагенцтва, сучасным СМІ часам не хапае тэхналагічна падрыхтаваных спецыялістаў. А гэта патрэбна яшчэ і для таго, каб выйсці на міжнародны ўзровень. Бо сёння мала гаварыць аб патрыятызме толькі ў межах краіны.
Удзельнікі сустрэчы сышліся на думцы, што падобныя мерапрыемствы павінны стаць традыцыйнымі, бо з’яўляюцца добрым падмуркам у перайманні вопыту, даюць магчымасць абмену методыкамі правядзення мерапрыемстваў патрыятычнай накіраванасці.
З першых вуснаў
Аляксандр Міхайлавіч РАДЗЬКОЎ, першы намеснік кіраўніка Адміністрацыі Прэзідэнта :
— Беларусам трэба падтрымліваць і ўмацоўваць адзінства народа. Мы цяпер асабліва адчулі, наколькі важна быць адзінымі, разумець сваю Радзіму, гістарычнае мінулае, берагчы гэта, падтрымліваць і ўмацоўваць сваё адзінства. Важна разумець, што пры раз’яднанасці адразу пачынаюцца праблемы, прычым не толькі эканамічныя і палітычныя, але і ваенныя, падобных прыкладаў цяпер шмат. Шмат у чым людзей аб’ядноўвае гістарычнае мінулае і традыцыі. Сведчыць пра гэта і той факт, што Музей гісторыі Вялікай Айчыннай вайны стаў важным месцам для нашых людзей. З першага дня працы ў музей прыходзіць шмат людзей розных узростаў, яны разумеюць, што гісторыя нас аб’ядноўвае.
Лілія Станіславаўна АНАНІЧ, Міністр інфармацыі:
—Сёння Беларусь з’яўляецца прыкладам маральных адносін грамадства і дзяржавы да праблем сучаснасці. Беларускае нацыянальнае інфармацыйнае поле павінна ўмацоўваць нашы маральныя прыярытэты і арыенціры, выхоўваць грамадзянскую адказнасць, патрыятызм, гістарычную і сучасную перспектыву. СМІ з выкарыстаннем сучасных тэхналогій уплываюць не толькі на розумы і сэрцы людзей, але і на дзейнасць краін. Мы бачым, што інфармацыйныя плыні не заўсёды фармуюцца ў інтарэсах краіны і народа. Неабходна сур’ёзна і асцярожна ставіцца да слова і да таго, што дэманструецца на экранах тэлевізараў і гучыць па радыё. Інтэрнэт уплывае на развіццё самых складаных працэсаў фарміравання інфармацыйных плыняў, аднак нацыянальная інфармацыйная прастора павінна заставацца лідарам фарміравання грамадскай думкі ў краіне, і для гэтага ёсць усе рэсурсы — творчыя, кадравыя і структурныя.
Людміла ПРАКАПОВІЧ.
На здымках: экспазіцыі музея Вялікай Айчыннай вайны. Фота аўтара.