Максім  Кудзін  з  кагорты  моладзі  аўтапарка.  Надзейнай,  адукаванай,  кваліфікаванай.  За  плячамі  аграрна-тэхнічны  каледж (спецыяльнасць – тэхнік-механік),  служба  ў  арміі  ў  войсках  Міністэрства  ўнутраных  спраў.  А  вадзіцельскае  пасведчанне  катэгорыі  А, В, С, Е.  Чацвёрты  год  ён  працуе  на  прадпрыемстве.  Пазалетась  новы  вялікагрузны  МАЗ даверылі.  З  прычэпам  адразу  35  тон  бярэ.  Не  бяда,  што  камандзіроўкі  частыя  і  працяглыя.  Затое  справы  важкія.

Мінулым  летам  працаваў  на  будаўніцтве  атамнай  станцыі  ў  Астраўцы,  цяпер  на  рамонце  аўтатрасы  Магілёў-Мінск.

– Можа  хочаш  перайсці  на  міжнародныя  перавозкі? – цікаўлюся  ў  яго.

– Навошта?, – здзіўляецца. – Мая  машына  практычна  новая. Зарабляю  добра.  Ды  ў  мяне  ж  сям’я.

Па  ўсім  відаць,  чалавек  сур’ёзны,  самастойны.  Летась  ажаніўся,  ужо  ёсць  першынец-сынок.  Дом  будуе.  Значыць,  корні  пускае  глыбока. Тут,  у  Клічаве,  нарадзіўся,  рос,  тут  свой  лёс  знайшоў  і  прызванне. А  за  такой  моладдзю – будучыня.