Смачна есці!

Больш за тысячу кілаграмаў тортаў вытворчага аддзела раённага спажывецкага таварыства пастаўлена ў гандлёвую сетку ў навагоднія і калядныя святы. Сёння пакупнікі жадаюць набыць прадукцыю не толькі смачную, але і натуральную. Таму асаблівым попытам карыстаўся вядомы яшчэ з часоў СССР класічны торт «Казка», у рэцыптуры якога натуральнае слівачнае масла, бісквіт, а таксама торт «Арэхавы», з аналагічных натуральных прадуктаў з дабаўленнем арэхаў. І жыхары раёна, і нашы госці з задавальненнем куплялі да святаў і клічаўскі фігурны вагавы шакалад «Арэхавы карнавал» з цэльнымі арэхамі, мучныя салодкасці «Лімончыкі» і «Грыбочкі» – удастоеныя ўзнагародаў рэспубліканскага конкурсу «Смаката-2023».

Ці не самым запатрабаваным прадуктам у гаспадынь для прыгатавання розных бутэрбродаў быў багет «Сталічны» ад мясцовых хлебапёкаў, які, дарэчы, выпускаецца без кансервантаў. Так, толькі за пару навагодніх дзён было прададзена каля 4 тысяч багетаў. Звычайна такі аб’ём продажу прыходзіцца амаль на паўмесяца. Смачна есці – жадаюць клічаўскія кандытары і хлебапёкі!

Запас бяды не чыніць

Мароз на двары, а дбайным гаспадарам ён не страшны, бо ярка гараць у печах дровы, у жыллі цёпла і камфотна. Толькі многія ўжо зараз, пакуль не надышоў гарачы час веснавой сяўбы, клапоцяцца аб паліве на будучы год. Дапамагчы ў гэтым гатовы і Клічаўскі лясгас. Тут яшчэ мінулай восенню набылі станок для колкі дроў, таму, калі ласка, для ўсіх жадаючых – дровы ў гатовым выглядзе! Для зручнасці транспарціроўкі іх укладваюць у збітыя клеці, кожная – аб’ёмам у 1 метр кубічны. Такія якасныя дровы мякка­ліставых парод рэалізуюцца і праз лясгасаўскую гандлёвую пляцоўку ў Магілёве, і для ўсіх жадаючых прама з лесапункта.

Акрамя таго, дровы круглыя, даўжынёй 2-4 метры, можна купіць у кожным лясніцтве лясгаса.

Сёння расце попыт і на паліўныя пілеты Клічаўскага лясгаса. Іх актыўна выкарыстоўваюць для ацяплення як усе яго падраздзяленні, так і ў цэлым Магілёўскага ДВЛГА. Набываюць такое паліва і прыватныя прадпрымальнікі, насельніцтва Бабруйскага раёна.

На канікулах – за каляднымі цудамі!

Зімнія канікулы для бацэвіцкіх школьнікаў атрымаліся незабываемымі. 6 студзеня дзеці, а сярод іх былі і выхаванцы аб’яднання па інтарэсах «Юныя турысты-краяведы», пабывалі ў шыкоўным падарожжы ў навагодні Гомель.

Дзеці пабывалі ў скверы імя Андрэя Грамыкі, знакамітага ўраджэнца Гомельшчыны. Далей бацэвіцкіх падарожнікаў захапіў незвычайны парк светавых мініяцюраў, дзе размешчаны копіі самых вядомых архітэктурных збудаванняў свету. Тут рабяты палюбаваліся Пізанскай вежай, зверылі гадзіннікі з Біг-Бэнам, пабачылі знакаміты рымскі Калізей і мноства іншых дзівос свету, сярод якіх і славутасці Беларусі: міні-копіі Нацыянальнай бібліятэкі, Брэсцкай крэпасці і іншае.

Добрая традыцыя для бацэвіцкіх вучняў – штогод наведваць навагодняе цыркавое прадстаўленне. Зараз яны пабывалі на адным з самых масштабных цыркавых шоў «Пясчаная казка», дзе сапраўды акунуліся ў цудоўную казку. Пад купалам працавалі акрабаты, на манежы выступалі розныя дрэсіраваныя жывёлы: вярблюды, коні, сабакі-лайкі, бегемот.

 А яшчэ гледачоў прама на прадстаўленні віншавалі са святамі Дед Мароз і Снягурка. Для сельскіх дзяцей паездка падарыла цудоўныя ўражанні. Педагогі школы выказваюць шчырае дзякуй бацькам за разуменне і падтрымку ў арганізацыі паездкі.

Тэкст: Ніна ІЗОХ.