У раёне

Пасадзі сваё дрэва 

З 9 па 16 красавіка ў Беларусі пройдзе штогодняя акцыя «Тыдзень лесу», прысвечаная Году гістарычнай памяці. ДЛГУ «Клічаўскі лясгас» запрашае ўсіх жадаючых прыняць удзел у пасадцы лесу. Для гэтага неабходна загадзя патэлефанаваць па нумары тэлефона 78-866 (намеснік кіраўніка па ідэалагічнай рабоце) або звярнуцца ў лясніцтвы, у якіх ужо вызначаны ўчасткі для пасадкі, зарэгістравацца.Так, клічаўляне і вяскоўцы могуць звярнуцца ў Віркаўскае, Клічаўскае, Патоцкае і Бацэвіцкае лясніцтвы. У кожнае з іх будзе завезены пасадачны матэрыял лясных культур з пастаяннага ляснога гадавальніка лясгаса. Работы хопіць усім! Давайце разам прымножым лясы Клічаўшчыны!

У Клічаве адкрыты «Пункт дабра» для дапамогі бежанцам з Украіны 

Як паведаміла першы сакратар раённага камітэта ГА БРСМ Юлія КОМАР, у Клічаве працуе дабрачынная пляцоўка «Пункт дабра» па зборы рэчаў першай неабходнасці для людзей, якія прыбываюць з Украіны ў Беларусь. Дапамагчы могуць усе жадаючыя. Патрэбныя рэчы першай неабходнасці – шампунь, вадкае мыла, зубная паста, шчоткі, вільготныя сурвэткі, медыцынскія маскі, пральны парашок, аднаразовы посуд, прадукты хуткага прыгатавання.«Пукт дабра» працуе ў Клічаўскім раённым камітэце БРСМ па адрасе: вул. Ленінская, 53, кабінет №26.

І гэта ўсё вясна! 

Менавіта чараўніцы вясне прысвячаўся нядаўні музычны салон ДУА «Дзіцячая школа мастацтваў г. Клічава». Вясна – гэта не толькі абуджэнне прыроды, але і росквіт лепшых памкненняў душы. Вясна – гэта пяшчотныя першацветы, узнёслыя пачуцці, усмешкі і натхненне. Менавіта вясне прысвячалі свае знакамітыя палотны Бацічэлі, Ван Гог, Ціцыян, мастакі-перасоўнікі, з творчасцю якіх і пазнаёміліся ўдзельнікі мерапрыемства. А што больш яскрава можа перадаць мелодыку вясны як ні музыка, тым больш напісаная рускім геніем Пятром Чайкоўскім? Вялікаму кампазітару прысвячалася асобная старонка музычнага салона, бо інакш і нельга. Той, хто нарадзіўся вясной – людзі асобыя, творчыя, ранімыя, натхнёныя. Усе з задавальненнем яшчэ раз згадалі пра такіх вялікіх творцаў – Леанарда да Вінчы, Уільяма Шэкспіра, Зігмунда Фрэйда, Уладзіміра Набокава, Міхаіла Булгакава і многіх іншых.Вясна – гэта гармонія, цёплыя адносіны паміж людзьмі, якіх нам зараз так не хапае, бо асабістыя зносіны замянілі гаджаты і інтэрнэт. А шчасце – гэта простыя рэчы: бачыцца з сябрамі і роднымі, сонейка ў небе, блакіт нябёс, мір на зямлі. Менавіта вясною мы святкуем самае светлае свята – Дзень Перамогі. І тое, што было, ніколі нельга забыць, патрэбна помніць!Пра ўсё гэта гаварылі вядучыя праграмы, яскрава і ўзвышана праз жывую музыку, цудоўныя песні выказалі настаўнікі школы мастацтваў: Руслан ХРЫСТАВОЙ, Кацярына СУРАВЕЦ, Іна ЮРКАВЕЦ, Алена Шчэрбіч, Сандра ЯШЧУК, Ірына ГАБРУСЬ, Арцём ВААКС, Вольга ДЫМАВА, Станіслаў ВІНАГРАДАЎ, Алена ШУМСКАЯ, Юлія ГАЛДЫБАН.Як і заўсёды, удзельнікі музычнага салона, а гэта настаўнікі, работнікі культуры, жыхары райцэнтра, былі шчыра ўдзячныя арганізатарам за хвілінкі сустрэчы з цудоўным светам мастацтва. Не хлебам жа адзіным жывы чалавек…

Тэкст: Ніна ІЗОХ.