Ужо 24 гады налічвае творчая біяграфія ўзорнага фальклорнага ансамбля «Купалачка». Гэты калектыў – многія дзясяткі дзяцей, для якіх спадчына беларускага народа: мова, песні, музыка, абрады, звычаі, танцы, гульні – сапраўдная каштоўнасць, арганічная, неад’емная частка іх жыцця. 
«Купалачка» – гэта дзіцячая візітоўка Клічаўшчыны не толькі ў Беларусі, а і ў Расіі, Балгарыі, краінах Балтыі і іншых краінах. Толькі за 2019 год калектыў і асобна яго удзельнікі папоўнілі скарбонку сваіх дасягненняў цэлым стосам узнагарод.
Ансамбль неаднаразова з вялікім поспехам прымаў удзел і ў міжнародным фестывальным праекце «Волна идей», у якім выступаюць дзеці і моладзь з розных краін Еўропы. Вось і 2020 год калектыў пачаў проста бліскуча.
Клічаўскія дзеці пакарылі Рыгу і Стакгольм або Каляды на Балтыцы 
Якраз пад час навагодніх і калядных святаў у Клічаў прыляцела навіна: Гран-пры VII міжнароднага фестывалю «Рождественская волна» заваявала 15-гадовая Аляксандра Маслоўская з аграгарадка Коўбча. Яе выступленне – песня на французскай мове – атрымала самую высокую ацэнку журы, якое прызнала Аляксандру лепшай у намінацыі «вакал» сярод 56-ці салістаў з розных краін.
Такія аглушальныя поспехі раптоўна не здараюцца!
Аляксандра Маслоўская: 
– Я ўжо сёмы год вучуся на аддзяленні народнай творчасці ў ДУА «Дзіцячая школа мастацтваў г. Клічава», сёлетняя выпускніца ўстановы. У «Купалачцы» у Наталлі Коктыш займаюся з першага дня. Беларускі фальклор, эстрадная песня, сцэна – важкая палова майго жыцця.
Гран-пры «Рождественской волны» – гэта нешта неверагоднае! Я вельмі рада, як і мае сёстры, і мама Марына Мікалаеўна Маслоўская, работнік культуры. Наша сям’я выказвае шчырую ўдзячнасць спонсару маёй паездкі – калектыву РАУС.
Верце, мары збываюцца! Калі гэтага вельмі жадаць і дзейнічаць!
У «Рождественской волне» выступалі пяцёра салістаў ансаблю «Купалачка». І ўсе дзеці прывезлі да дому важкія ўзнагароды. Так, у намінацыі «народныя спевы» званне лаўрэата 3-й ступені прысвоена Таццяне Калубай, 2-й ступені – Дар’і Клімянковай, а пераможцам у гэтай намінацыі стаў Максім Кардымон!
У намінацыі «эстрадны вакал» званне лаўрэата 1-й ступені прысу-джана Мілане Красько.
Самай маленькай артыстцы з падрыхтоўчай групы «Купалачкі» Марыі Маслоўскай (сястрычцы ўладальніцы Гран-пры) усяго 3 гады! Гэта дзяўчыначка стала лаўрэатам 1-й ступені! Вось якія яны, таленты Клічаўскай зямлі!
А цяпер раскрыем інтрыгу. «Купалачка» – гэта дзясяткі адораных рабят, гэта неверагодна творчы і таленавіты іх кіраўнік Наталля Коктыш, і … неверагодна адданыя сваім дзецям бацькі! Яны – адно цэлае, адна каманда. Мяркуйце самі: сёння асноўная колькасць міжнародных фестываляў праводзяцца на платнай аснове. Патрэбна аплачваць удзел кожнага маленькага канкурсанта з уласнага сямейнага бюджэту. Сумы сапраўды значныя! Але таты і мамы, бабулі і дзядулі выдзяляюць важнейшае ў жыцці – яны клапоцяцца аб заўтрашнім дні сваіх нашчадкаў. Больш таго, у выступленнях за мяжой су-праваджаюць дзяцей не толькі іх кіраўнікі, але і бацькі.
Вось так гуртам, прадстаўнічай дэлегацыяй удзельнікі «Купалачкі» разам з бацькамі, усяго 19 чалавек, пабывалі 4-8 студзеня ў круізным фестывальным туры Рыга – Стакгольм (Латвія – Швецыя).

Ад першай асобы 
Аліна Краўчанка, 
Наталля Лапунова: 
– Гэта было ўнікальнае каляднае падарожжа, у якім мы наведалі казачныя ў навагоднім убранні Рыгу і Стакгольм – сталіцы Латвіі і Швецыі.
Конкурснае праслухоўванне салістаў «Купалачкі» прайшло 4 студзеня ў Рызе, а гала-канцэрт пераможцаў фестывалю – ужо на борце круізнага лайнера «Рамантыка» 6 студзеня. Мы рады поспехам нашых салістаў «Купалачкі». Але на гэты раз большасць удзельнікаў калектыву і мы, бацькі, былі ў іх групе падтрымкі, а найперш, проста цудоўна адпачывалі.
Жаданні на Нараджэнне Хрыстова мы загадвалі на караблі прама пасярод Балтыйскага мора. Уражанняў не злічыць! На нашым самым вялікім лайнеры на маршруце Рыга – Стакгольм была проста шыкоўная праграма: фестывальная канцэртная праграма, эксклюзіўная дыскатэка «Волны идей» з падарункамі кожнаму ўдзельніку фестывалю, забаўляльная праграма (канцэртнае шоу, караоке, жывыя канцэрты), а яшчэ магазіны, рэстараны і іншае. З адкрытых палубаў мы любаваліся незабыўнымі відамі на скалы і астравы каля берагоў Швецыі. У нас была найцікавейшая экскурсія па Стакгольме, пасля – і па Ры зе. Падарожжа незабыўнае і для дзяцей, і для нас, дарослых.
Ніна ІЗОХ. 
Фота з інтернэт-рэсурса 
https//vk.com/wall-106371087_1421