КАЛЯДНАЯ ЗОРКА
Як добра, што ёсць такое светлае свята Нараджэння Хрыстова і выдатная традыцыя збірацца ўсім разам на святочны канцэрт. Пакуль маленькія артысты хваляваліся, а матулі старанна папраўлялі ім завіткі і локаны, распраўлялі бальныя сукенкі, дарослыя і дзеці запаўнялі залу, дарылі прыемныя ўсмешкі, віталіся і віншавалі са святам. Многія затрымаліся на выставе, якую падрыхтавалі ўмельцы Дома рамёстваў і раённай бібліятэкі. З задавальненнем любаваліся прыгожымі рэчамі, створанымі ўмелым рукамі майстроў і набывалі сувеніры.
Па добрай традыцыі калядны канцэрт быў напоўнены творамі, якія славілі Ісуса Хрыста і Маці Божую. У ім прынялі ўдзел дзіцячыя творчыя калектывы і асобныя выканаўцы, якіх падрыхтавалі Юлія Галдыбан, Наталля Коктыш, Алена Шумская, Вераніка Кірплюк, Гаянэ Хрыставая, Наталля Рыбікава. Эпілогам канцэртнай праграмы стаў вядомы твор Ф. Шуберта “Аве Марыя” ў выкананні Веранікі Уваравай, некалькі музычных твораў выканалі артысты заслужанага аматарскага калектыву Рэспублікі Беларусь ансамбля народнай песні “Жытніца” і народны акадэмічны хор раённага Дома культуры.
–З Калядамі вас, шаноўныя сябры! Я хачу падзякаваць за тое, што вы тут і зноў ўсе разам мы адзначаем цудоўнае свята, якое сагравае нашу душу, вызваляе ад цяжару сэрца і ўсяляе надзею, — сказаў вітаючы прысутных протаіерэй Сергій, настаяцель Свята – Дабравешчанскай царквы. І пажадаў прысутным моцнага здароўя і прыемных святак.
На канцэрце прысутнічалі старшыня райвыканкама Ф. В. Вашчыла з жонкай, родныя і блізкія таленавітых дзетак, жыхары горада.
Аліна СУДНІК.