МЭТАВАЯ ІНАВАЦЫЙНАЯ ПЛЯЦОЎКА
па арганізацыі работы па захаванні і развіцці культурна-гістарычных і духоўна-маральных традыцый беларускага грамадства адбылася на мінулым тыдні ў нашым раёне. Стажыроўку праходзілі супрацоўнікі аддзелаў ідэалагічнай работы, культуры і па справах моладзі райвыканкамаў. Гасцям з Бабруйскага, Глускага, Асіповіцкага, Быхаўскага і Магілёўскага раёнаў прапанавалі вялікую і насычаную праграму, падзяліліся вопытам работы па пазначанай тэме.
Вітаў гасцей і знаёміў з раёнам В. Г. Ваакс, начальнік аддзела ідэалагічнай работы, культуры і па справах моладзі райвыканкама. Яго намеснік А. П. Ярошка правяла “круглы стол” на тэму «Формы і метады работы па арганізацыі працы, накіраванай на захаванне і развіццё культурна-гістарычных і духоўна-маральных традыцый беларускага народа». Аб крыніцах народнай культуры, захаванні і папулярызацыі народных традыцый і абрадаў у нашым раёне расказала Ж. Я. Ачыновіч, загадчыца аўтаклуба РДК. Ёю сабраны ўнікальныя матэрыялы па фальклоры і каляндарна-абрадавых святах, якімі багатая клічаўская зямля. На захаванні і развіцці культурна-гістарычных і духоўна-маральных традыцый у розных групах сучаснага грамадства засяродзілі свае выступленні І. В. Фясько, дырэктар цэнтральнай раённай бібліятэкі, і Н. У. Храмянкова, дырэктар краязнаўчага музея. Цікавым і яркім было выступленне Л. Л. Ачыновіч, кіраўніка пошукавай групы «Ольса» абласнога гісторыка-патрыятычнага клуба «ВІККРУ».
Госці наведалі ДЛГУ «Клічаўскі лясгас», дзе С. І. Чарэйчык, намеснік дырэктара па ідэалагічнай рабоце, і галоўны інжынер В. Л. Сукора пазнаёмілі іх з гісторыяй і вытворчай базай прадпрыемства, паказалі працэс сучаснай перапрацоўкі драўніны.
Затым удзельнікі мерапрыемства наведалі храм, дзе з імі пагутарыў настаяцель прыходу протаіерэй Сергій.
Яны таксама прынялі ўдзел у мітынгу, прысвечаным 72-й гадавіне вызвалення раёна ад нямецка-фашысцкіх захопнікаў. На мемарыяльным комплексе “Уса-кіна” пасля ліціі па воінстве і нявінна забітых ахвярах вайны, якую адслужыў протаіерэй Сергій і прывітальнага слова У. В. Кнігі, старшыні раённага Савета дэпутатаў, яны ўсклалі кветкі да манумента і вечнага агню і ўшанавалі памяць вызваліцеляў хвілінай маўчання.
Затым прысутныя наведалі партызанскі лагер, паўдзельнічалі ў тэатралізаваным дзействе па прарыве блакады «Адлер», пачаставаліся партызанскай кашай, з задавальненнем паспявалі песні ля вогнішча.
Завяршыўся першы дзень працы пляцоўкі наведваннем краязнаўчага музея і музычнай гасцінай.
Мерапрыемствы другога дня прайшлі на базе УА «Клічаўскі дзяржаўны аграрна-тэхнічны каледж». Ю. І. Васілеўскі, дырэктар установы, і В. Ф. Ліпкін, стваральнік і захавальнік музейнага комплексу «Сялянская сядзіба», разам з супрацоўнікамі каледжа і ветэранскім ансамблем «Крыніца», навучэнцамі зрабілі ўсё магчымае, каб наведванне ўстановы пакінула незабыўны след у сэрцах нашых гасцей і ім гэта ўдалося.
Падводзячы вынікі двух дзён працы, А. М. Ліпскі, намеснік начальніка ўпраўлення культуры, начальнік аддзела мастацтваў і культурна-асветніцкай работы, адзначыў высокі ўзровень падрыхтоўкі і правядзення інавацыйнай пляцоўкі, падзякаваў усім за плённую працу.
Аліна СУДНІК.
Фота аўтара.