ТАПІАРЫЙ, ПЭЙП-АРТ І РУКАТВОРНЫЯ ЦУДЫ “ФАНТАЗІІ”
“Спасцігаць новае ніколі не позна” – лічуць удзельніцы гуртка дэкаратыўна-прыкладнога мастацтва “Фантазія”, што дзейнічае пры раённым Доме рамёстваў.
Усе яны людзі сталыя, адукаваныя, кожная – у мінулым або сёння — прафесіянал у пэўнай галіне дзейнасці. А сюды на заняткі прыходзяць, каб навучыцца ствараць па-сапраўднаму прыгожыя рэчы ўласнымі рукамі. Вырабы ж ручной работы
сёння цэняцца ва ўсім свеце. Імі можна ярка, арыгінальна ўпрыгожыць інтэр’ер кватэры або зрабіць незвычайны падарунак родным, сябрам. А калі дасягнуць дасканаласці майстэрства, то можна паўдзельнічаць у выстаўках розных узроўняў.
Заняткі ў “Фантазіі” – гэта і магчымасць зносін з цікавымі людзьмі, што таксама важна, а часам і галоўнае.
І хоць у гуртку існуе пэўны графік работы, прыйсці сюды можна ў любы зручны для сябе час. Яго кіраўнік Святлана Васільеўна Койпіш, яна ж метадыст-майстар Дома рамёстваў, кожнаму ідзе насустрач, праводзіць і індывідуальныя заняткі. А навучыць яна можа сакрэтам розных відаў дэкаратыўна-прыкладнога мастацтва, больш сучасных. Так, пад час нашай нядаўняй сустрэчы ішоў занятак у тэхніцы тапіарый. Майстрыхі рабілі маленькае рукатворнае цуда – аўтарскае Дрэва Шчасця. Кожнае – па-свойму непаўторнае, створанае па ўласным гусце, у любімай колеравай гаме, з розных матэрыялаў – паперы, зіхаткіх елачных бусаў і цацак, атласных і капронавых стужак і безлічы іншага. Дарэчы, найбольш дорагакаштуючыя матэрыялы для работы майстрыхі набываюць за свой кошт.
Пацікавілася творчымі планамі аб’яднання. Па словах Святланы Васільеўны, у бліжэйшай перспектыве яна будзе праводзіць заняткі, даваць майстар-класы па тэхніках скрапбукінга (дэкаратыўнае афармленне паштовак, фотаальбомаў, рамак, прадметаў інтэр’ера), дэкупажа (дэкарыраванне розных прадметаў), пэйп-арт (сурвэтачная тэхніка) і іншых.
Ёсць ужо і дамоўленасць з прызнанымі майстрыхамі народнага аматарскага аб’яднання “Спадчына” аб правядзенні тут майстар-класаў па розных тэхніках рукадзелля, у тым ліку вязання кручком. І ва ўдзельніц гуртка таксама ёсць магчымасць падзяліцца ўласным вопытам у якой-небудзь тэхніцы ДПМ.
Прабыла ў раённым Доме рамёстваў зусім нядоўга, а выйшла ў выдатным настроі. Дарэчы, як і заўсёды. Надзвычай тут дружалюбны, спрыяльны мікраклімат, бо працуюць людзі шчырыя, таленавітыя. Прыемна было і па-новаму адкрыць для сябе як творцаў удзельніц “Фантазіі”. Пабачыла на дзіва прыгожыя навагоднія тапіарыі, бліскучыя ад задавальнення вочы майстрых. І мне тут жа захацелася стаць “сваёй” у гэтай кагорце. Але ўсяму свой час…
Ніна ІЗОХ. Фота аўтара.