Няхай пануе мір на планеце і смяюцца дзеці
У нядзелю ў рамках святкавання Дня абароны дзяцей у гарадскім парку прайшло маштабнае свята “Прывітанне, лета!”. Яно прызвана ўмацаваць каштоўнасць і значнасць моцнай дружнай сям’і і шчаслівага дзяцінства, і штогод радуе клічаўлян і гасцей горада.
Асаблівае месца ў свяце заняў традыцыйны, праводзіцца ўжо чацвёрты год, любімы клічаўлянамі раённы конкурс “Парад дзіцячых калясак”, арганізатарамі якога з’яўляюцца раённы выканаўчы камітэт і яго структурныя падраздзяленні: аддзел ідэалагічнай работы, культуры і па справах моладзі, ад-дзел адукацыі, спорту і турызму. І сёлета людзі не былі расчараваныя, бо арганізатары і ўдзельнікі пастараліся па-добраму здзівіць і ўразіць, падрыхтавалі сапраўднае маляўнічае шоу.
Адчувалася, што кожная без выключэння сем’я – удзельніца, а іх было 11, грунтоўна рыхтавалася да выступлення і творчай абароны, прычым дапамагалі ім не толькі родныя, а нават і калегі. І кожная сям’я праявіла палёт фантазіі, творчасці, вынаходніцтва, бязмежны акіян пяшчоты да малышоў, са-праўды пакарыла сэрцы гледачоў. Напрыклад, сям’я Іваніцкіх падрыхтавала каляску “Мядовая краіна”, Максімавых – “Майдадыр”, Грузд – “Трактар “Яраславец”, Вашчыла – “Індыйскі вігвам” і г.д. Журы было цяжка вызначыць пераможцу, бо многія былі годныя гэтага звання, але ў конкурсе ён заўсёды толькі адзін.
І вось гучаць урачыстыя фанфары. Гран-пры конкурсу і галоўны прыз – мяккая цацка ружовы слонік – прысуджаецца калясцы “Лялька Ксюша” сям’і Дар’і і Аляксандра Лызо. Кожная сям’я – канкурсантка прызнаецца пераможцай у намінацыях. Так, у намінацыі “Шчасця шмат не бывае” – каляска “Рамонак” сям’і Казінец, у намінацыях “Каляска – карнавал” – каляска “Анёл” сям’і Храпко, “Гістарычны эцюд” – каляска “Піянерыя” сям’і Дубавіцкіх, у намінацыях “Каляска-казка” – каляска “Цар звяроў” сям’і Кушнер, “Сюрпрыз” – каляска “Каралева” сям,і Губанавых. У намінацыі “Прыз сімпатый гледачоў” перамагла каляска “Кветкавая паляна” сям’і Федаровіч. Кожная сям’я – канкурсантка атрымала падарункі ад раённага выканаўчага камітэта, спецыяльныя прызы ад спонсараў мерапрыемства: ААТ “Клічаўскія Бытпаслугі”, вытворчага аддзела і ўчастка грамадскага харчавання раённага спажывецкага таварыства.
Аматараў мастацтва, песні, музыкі сабраў гала-канцэрт удзельнікаў адкрытага дзіцячага конкурсу творчага майстэрства “Клічаўская зорачка”, у час якога адбылося і ўрачыстае ўзнагароджванне яго пераможцаў у розных намінацыях.
Малых і дарослых запрашаў дзіцячы гарадок “Шчаслівае дзяцінства”, у якім працавалі пляцоўкі “Доўгая каса – дзявочая краса”, “Дзіцячы бодзі-арт”, тэрыторыя здароўя, ішла конкурсна-забаўляльная праграма для дзяцей “Забавы лета”. Цікавую праграму прапанавалі раённая і дзіцячая бібліятэкі, у якой былі прадстаўленне лялечнага тэатра, і фота на памяць “Стань героем казкі”, і іншае. Малечу ўсіх узростаў сабраў конкурс мыльных пузыроў, працавалі “Кірмаш салодкасцей”, “Алея рамёстваў”, творчая майстэрня “Вясёлка творчасці”, розныя атракцыёны і г.д.
Прайшлі і акцыі, дэманстрацыя спецсродкаў, паказальныя выступленні супрацоўнікаў раённага аддзела ўнутраных спраў райвыканкама і раённага аддзела па надзвычайных сітуацыях. Асабліва гледачоў уразілі моманты выступлення кінолага і службовага сабакі па затрыманні ўмоўнага злачынцы, а яшчэ тушэнне ачага ўзгарання выратавальнікамі, магчымасці сучаснай спецтэхнікі.
Сотні гледачоў сёлетняга свята былі задаволены маляўнічай і вясёлай палітрай мерапрыемства. Здавалася і сама прырода ўторыла сямейнаму шчасцю, усміхалася з бяздоннага блакітнага неба яркім сонейкам. Над усім вітаў пазітыўны настрой, ды яно і зразумела. Пачаліся школьныя канікулы, сезон адпачынку. Прывітанне, лета!
Ніна Ізох.
Фота аўтара.