Мы – за моцнае здароўе!
Каля 700 аграрыяў Магілёўшчыны 23-25 студзеня сустрэліся ў Клімавічах на V абласной зімняй спартакіядзе, удзельнікамі якой сталі ўсе раёны Магілёўшчыны, холдынгі, аб’яднанні, арганізацыі і кіраўнікі аграпрамысловага комплексу.
На тры дні механізатары, жывёлаводы, спецыялісты, работнікі перапрацоўчых прад-прыемстваў апранулі спартыўную форму і выйшлі на старты. Кожная з 28 каманд па-спрабавала свае сілы ў індывідуальных спаборніцтвах і камандным заліку ў дартсе, валейболе, шашках, гіравым спорце, плаванні, перацягванні каната, кулявой стральбе, настольным тэнісе. У поўным сэнсе зімняй спартакіядай спаборніцтвы не сталі, бо з-за цёплага надвор’я, калі замест гурбаў снегу цяклі ручаі, прыйшлося адмяніць лыжныя гонкі і лыжную эстафету.
Але, як адзначыў удзельнік нашай каманды Яўген Кароткі ў інтэрв’ю абласному тэлебачанню ў час урачыстасцей адкрыцця спартакіяды, “у прыроды няма дрэннага надвор’я. Намаганні спартсменаў, як заўсёды, накіраваны толькі на рэзультат”.
І сапраўды, змены ў праграме на ход спаборніцтваў не паўплывалі. Клічаўляне таксама не падвялі. У мінулагодняй зімняй абласной спартакіядзе ў Мсціслаўлі наша каманда заняла толькі 16-е месца, зараз увайшла ў дзясятку лепшых. Вынік – 9-е агульнакаманднае месца.
І на гэты раз парадавалі нашы валейба-лісты. На працягу ўсіх шматлікіх сустрэч яны трымалі высокую планку майстэрства, прадэманстравалі сыгранасць, адзінства каманды. Усіх уразіла вытрымка, вынослівасць валейбалістаў, іх воля да перамогі, адданасць спорту. Ад іх гульні ў балельшчыкаў адрэналін у крыві проста зашкальваў, прычым не толькі ва ўдзельнікаў зборнай каманды нашага раёна, але і добрай часткі спартсменаў з іншых каманд вобласці! Бо ў сапраўдным спорце, нягледзячы на саперніцтва, павагу выклікаюць майстры! Клічаўляне прабіліся ў фінал і заваявалі “бронзу” спаборніцтваў! Саступілі толькі мацнейшым камандам – валейбалістам са Шклоўскага раёна і зборнай камандзе УК “Холдынг “Магілёўводбуд”, у склад якой уваходзілі і работнікі нашага ААТ “ПМК-89 Водбуд”.
“Бронзу” ў асабістым заліку па настольным тэнісе заваяваў выкладчык дзяржаўнага аграрна-тэхнічнага каледжа Андрэй Яўгенавіч Сяўбо. Малайчына, так трымаць!
Важкую колькасць ачкоў у агульную скарбонку каманды дадаў і выкладчык гэтай установы Сяргей Георгіевіч Сясьмей. Ён выступаў у гіравым спорце ў катэгорыі да 90 кілаграмаў і заняў 5-е месца.
Гонар раёна ў спаборніцтвах па шашках адстойвала самая ўзроставая ўдзельніца – 64-гадовая Валянціна Паўлаўна Ісачкіна з Арэхаўкі. За шашачнай дошкай яна правяла амаль поўныя два дні! Выйграла безліч партый і выйшла ў фінал! Вынік – 5-е месца. Дарэчы, у раёне і за яго межамі Валянціна Паўлаўна добра вядомая і як здатная майстрыха-вышывальшчыца, асноўныя матывы яе работ – праваслаўныя іконы і храмы.
Рэзультатыўна выступілі на спаборніцтвах па дартсе ветурач УКСП “Саўгас “Дабраволец” Арцём Ільін, інжынер па тэхніцы бяспекі КСВК “Калгас “Савецкая Беларусія” Юлія Лагаева.
Абласная спартакіяда стала значнай па-дзеяй у жыцці работнікаў АПК вобласці. Усе яе спаборніцтвы сталі сімвалам настойлівасці, упэўненасці, мэтанакіраванасці, вынослівасці, сілы волі, з’яднанасці спартсменаў. Яркімі, незабыўнымі фарбамі запомняцца маляўнічыя ўрачыстасці адкрыцця і закрыцця спартакіяды, узнагароджвання пераможцаў.
Асабліва хвалюючы і важны момант – перадача сімвалічнага агню спартакіяды гаспадарам наступнай, VI абласной летняй спартакіяды. Такога гонару ўдастоена наша клічаўская зямля! Да пабачэння, спартакіяда! І да хуткай сустрэчы!
Сяргей Паўлавіч Грашылаў, старшыня раённага аб’яднання прафсаюзаў:
– Спартакіяда работнікаў АПК – гэта спаборніцтвы, актыўны адпачынак, павышэнне прэстыжу спорту на прадпрыемствах, прапаганда здаровага ладу жыцця. Хацелася б выказаць шчырую ўдзячнасць усім удзельнікам зборнай каманды раёна, за асабліва актыўны ўдзел – работнікам КСВК “Калгас “Радзіма”, “Калгас “Савецкая Беларусія”, УКСП “Саўгас “Дабраволец”, УА “Клічаўскі дзяржаўны аграрна-тэхнічны каледж”, за актыўную жыццёвую пазіцыю ў спорце – інструктару па спорце КСВК “Калгас “Радзіма” Я.В. Кароткаму, С.Г. Сясьмею, А.Я. Сяўбо, трэнеру А. В. Ляху і іншым.
Наша ўдзячнасць і прызнанне – сёлетнім фундатарам спаборніцтваў: КСВК ”Калгас “Савецкая Беларусія”, СВУ “Зарэчны” ДЛГУ “Клічаўскі лясгас”. Без вашай дапамогі не атрымалася б наша паездка, выступленне, спартыўныя здабыткі.
Глыбока сімвалічны факт, што VI летняя спартакіяда ў год 70-годдзя Вялікай Перамогі пройдзе на клічаўскай зямлі. Гэта яшчэ раз падкрэслівае той вялікі ўклад, які ўнёс наш партызанскі край у перамогу над нямецка-фашысцкімі захопнікамі ў гады Вялікай Айчыннай вайны.
Мы проста абавязаны зрабіць усё неабходнае, каб забяспечыць належны ўзровень арганізацыі і правядзення будучай спарта-кіяды ў нашым раёне. Звяртаюся да кіраў-нікоў усіх раённых службаў з просьбай ужо зараз працаваць над стварэннем належнай матэрыяльна-тэхнічнай базы спаборніцтваў. Кіраўніцтву сельгасарганізацый неабходна стварыць умовы для павышэння спартыўнага майстэрства работнікаў і даць ім магчымасць рэгулярна трэніравацца. Хацелася б бачыць сапраўдную актыўнасць і зацікаўленасць у гэтай справе ўсіх раённых спартыўных арганізацый і ўстаноў.
Да нас прыедуць каля 700 спартсменаў з усіх рэгіёнаў вобласці, і нам трэба выглядаць годна па ўсіх пазіцыях!
Матэрыялы Ніны Ізох.
Фота Аляксандры Пронькінай (газета “Зямля і людзі”), Алены Ганчаровай.