ФЕЯ ПРЫГАЖОСЦІ, ДОБРАГА НАСТРОЮ І НЕЗАБЫЎНЫХ УРАЖАННЯЎ
Калі ласка, знаёмцеся:
Вікторыя Юр’еўна КОЙПІШ
Па спецыяльнасці, атрыманай у Беларускім дзяржаўным зканамічным універсітэце, – эканаміст, па прызванні – стыліст, дэкаратар, фларыст.
Прыгажуня Вікторыя замужам за Антонам Койпішам.
Іх сямейны стаж – 5 гадоў, разам яны выхоўваюць 4-гадовую дачушку Эвеліну.
Па гараскопу – Казярог.
Па натуры — добрая, адкрытая, надзейная, сціплая і вельмі таленавітая.
Кола яе інтарэсаў — неабмежаванае, але на данным этапе больш за ўсё цікавіцца ўсім, што датычыцца афармлення і дызайну ў галіне вясельнага бізнесу, і сямейнай педагогікай.
– Вікторыя, раскажыце, калі ласка, з чаго пачалося Ваша захапленне і жаданне асвойваць навуку дызайна і фларыстыкі?
– Упершыню задумалася над гэтым, калі рыхтавалася да ўласнага вяселля. Я была пераканана: каб вяселле ўдалося і запомнілася, мала нагатаваць шмат смачных страў, трэба яшчэ стварыць атмасферу свята. Мне вельмі хацелася, каб надоўга засталіся ў памяці гасцей, якія прыйшлі падзяліць з намі радасць нараджэння новай сям’і, прыемныя ўспаміны. А паколькі такія паслугі ў нашай мясцовасці ніхто не аказваў, то ўсё прыйшлося ствараць самой. Трэба заўважыць, што працэс мяне захапіў, а вынік атрымаўся нядрэнны. Але, каб працаваць у сферы афарміцельскага вясельнага бізнесу, аднаго жадання мала, трэба было атрымаць адпаведныя веды і прайсці курсавую падрыхтоўку. Ды і цяпер прыходзіцца пастаянна сачыць за тэндэнцыямі моды ў гэтай сферы і навінкамі. Шмат чытаю, наведваю семінары па фларыстыцы і вясельным дэкоры як у нашай краіне, так і за яе межамі, прымаю ўдзел у вебінарах. Актыўна супрацоўнічаю з іншымі майстрамі, з якімі мы аб’ядноўваемся ў сапраўдныя каманды і разам з прафесіяналамі розных напрамкаў (фатографы, візажысты, дэкаратары, стылісты, фларысты, парыкмахеры) ствараем праекты дэкору.
Я вельмі люблю фларыстыку. Выкарыстанне прыроднай прыгажосці і непаўторнасці жывых раслін дазваляе ствараць цудоўныя кампазіцыі, якія становяцца ўпрыгажэннем урачыстасці і выдатным падарункам маладажонам і іх гасцям. Я з задавальненнем прымяняю фларыстычныя кампазіцыі ў дэкарыраванні інтэр’ера. Гэта модна, стыльна і вельмі прыгожа. Фларыстыка не толькі дорыць нам багаты свет прыгажосці і гармоніі, але і дазваляе пастаянна адкрываць штосьці новае, дае неперавершаныя магчымасці для самавыяўлення.
– Што цікавіць Вашых патэнцыяльных кліентаў? Якія трэнды цяпер карыстаюцца попытам?
— Заказчыкаў, канечне ж, цікавяць навінкі сезона. У гэтым бізнесе існуе мода на колеры. Сёлета, напрыклад, моднымі былі каралавыя і мятныя адценні. Мы абмяркоўваем, тэкстылем якіх тэкстур і колераў будуць аформлены сталы, стулы, прэзідыум (так на мове дэкаратараў называецца стол, за якім сядзяць маладажоны), што будзе дамінаваць у афармленні вясельнага картэжу і гэтак далей.
Калі ўдала падабраць адценні, то за кошт камбінавання розных тэкстур можна стварыць вельмі эфектны дэкор вяселля па любімым літаратурным творы, фільме, па эпасе – сярэдневечча, рэнесанс і таму падобнае.
Я вельмі дэталёва абмяркоўваю з заказчыкамі ўсе нюансы будучага вяселля, высвятляю іх каляровыя густы і пажаданні. Пры стварэнні праекта ўлічваю фінансавыя магчымасці, імкнуся прапанаваць найбольш даступныя і бюджэтныя матэрыялы і элементы дэкору. Нават калі фінасавыя магчымасці кліентаў не дазваляюць размахнуцца на поўную, то ўсё роўна можна знайсці арыгінальнае рашэнне дэкору. Некаторыя, напрыклад, просяць аформіць вясельную залу менавіта так, як было ў сяброўкі Светкі. Але такі падыход не задавальняе мяне як аўтара і стваральніка. Я не магу паўтарацца і абавязкова ўношу нейкія новыя элементы ў афармленне, каб не губляць сваю прафесійную годнасць.
Пра модныя трэнды вясельнага дэкору можна гаварыць шмат. Ужо некалькі сезонаў існуе модная плынь афармляць вяселлі дэталямі з паперы. Такі вясельны дэкор існаваў і раней, але з развіццём тэндэнцый з’явілася вельмі шмат новых відаў такога афармлення. Сёння ўпрыгожванні з паперы на вяселлі сталі пажаданнем многіх нявест, а ў гэтым сезоне – гэта проста трэнд.
Усё больш папулярнымі становяцца выязныя рэгістрацыі. Можна на беразе ракі, ці ў садзе, ці пад нейкім разгалістым дрэвам стварыць непаўторную пляцоўку для заключэння шлюбу. Яднанне з прыродай, экалагічныя матэрыялы, павевы ветру і фантазія дэкаратара дазваляюць стварыць атмасферу ўрачыстасці і арыгінальнасці.
– А як ставяцца маладажоны да нацыянальнага каларыту на вяселлі?
– На вялікі жаль, пакуль яшчэ ніхто не заказваў афармленне вяселля ў нацыянальным стылі. Я вельмі чакаю такі заказ. Ёсць ідэі. Ёсць жаданне і нават матэрыялы ёсць.
– Што для Вас, Вікторыя, галоўнае у жыцці?
– Сям’я, канечне. Мой муж, дачушка, мае любімыя браты, нашы бацькі. Дарэчы, нам з мужам вельмі пашанцавала з бацькамі, яны ў нас адукаваныя, разумныя, інтэлігентныя і вельмі прагрэсіўныя людзі. З маімі мы жывем пад адным дахам, і я ўдзячная, што яны дазваляюць нам будаваць сваю сям’ю так, як мы таго хочам. Нам вельмі камфортна разам, а гэта вельмі важна.
Наша дачушка Эвеліна – гэта планета, вакол якой верціцца жыццё. Мы з ёй праводзім шмат часу. Разам чытаем казкі, малюем, ладзім тэатр ценяў, гуляем, займаемся дэкарыраваннем і фларыстыкай. Дзяцей трэба не проста любіць, іх трэба з пялюшак выхоўваць.
– Хутка Новы год. Якія парады Вы далі б нашым чытачам?
– Да свята, канечне ж, трэба рыхтавацца. Не абавязкова купляць дарагія і не заўсёды экалагічныя цацкі і ўпрыгожванні. Пры жаданні можна ўпрыгожыць ёлку альбо сасновую галінку падручнымі сродкамі, як, напрыклад, мы зрабілі гэта ў нашым гандлёвым доме Незабытоўскіх. Белыя розных памераў шары, якія зроблены са звычайных швейных нітак і сілікатнага клею і пры мінімальных фінансах, некалькі бантоў з абгортачнай паперы – і атрымалася стыльная, прыгожая і арыгінальная навагодняя ёлка.
Абавязкова парадуйце родных элементамі навагодняга дэкору, напрыклад, упрыгожце акно гірляндай, на столік пастаўце кампазіцыю з жывых кветак ці свечак, каля люстэрка павесце некалькі звязаных яркай лентай ёлачных цацак, а на люстру ці свяцільнік прывяжыце фігурку выразанага з паперы Анёла. Варыянтаў сотні, трэба толькі не ляніцца і праявіць фантазію і жаданне. Сёння вельмі моднымі сталі навагоднія вянкі, імі ўпрыгожваюць дзверы, прасценкі. Аснову вянка можна зрабіць з чаго толькі пажадаеце: з хвойных галінак, з саломы, з гнуткіх галінак дрэў, з яблыкаў, урэшце. А ўпрыгожыць іх усім, што ёсць пад рукой.
— Дзякуй Вам, Вікторыя, за гутарку і парады. Творчага натхнення і шчасця Вам, а ў Вашай асобе ўсім такім жа, як Вы – маладым, таленавітым, нераўнадушным і актыўным.
Аліна СУДНІК.