ПРЫЦЯГНЕННЕ ЗЯМЛІ. ПРЫЦЯГНЕННЕ ПАЛЁЎ

Зачырванелі  гронкі  рабіны – сустракай   восень-багатуху!
Сёлета  яна  сапраўды  шчодрая:   людзі  кошыкамі  носяць  з  лесу  крамяные  баравікі  і   маладзенькія   чырвонагаловікі,  падбярозавікі, маслякі,   голле   яблынь   аж  гнецца  пад  цяжарам  наліўных  пладоў,  бульбы  людзі  накопваюць  пад  300  мяхоў  з  невялікіх  участкаў,  на  балотах  нашых  журавіны  спеюць.  А  хлебны  каравай   які   ладны!   У  КСВК  “Калгас  імя  Тэльмана”  ён  заважыў  больш  за  4700  тон  збожжавых  і  зернебабовых.
Лёгкі  хлеб  бывае  хіба  што  ў  казках.  А  так,  хто  дбае,  той  і  мае.  Гэту  жыццёвую  мудрасць  добра  засвоіў  і  Сяргей  КОЗЫР    са  Старога  Вострава.   На  ўсё   ў   яго   сучаснае бачанне.  Лічыць,  што  ў  жыцці   ўсяму  можна  навучыцца  (праз  кнігі  таксама),  было  б  жаданне. У  свае  33  гады  ён    трактарыст  1 класа,  трактары  розных  марак,  камбайны – усё  па  плячы.  Працаваць  жа  ўмее  так,   што  за  летні  месяц  зарабляе  нават  больш   за  тых,  хто   за  “доўгі  рубель”  кладзе  здароўе   за  мяжой.
Цікаўлюся:  адкуль  такія  карані?
– З   зямлёй  лёс  усёй   нашай  сям’і   звязаны, – расказвае  Сяргей  Мікалаевіч. –  Бацька  ў  свой  час  на  трактары  на  мясцовых  палетках  завіхаўся.  Ад  яго  і  пераняў  гэту  навуку,   малы  быў  рады,  калі  дазваляў  ён  якую   гайку  закруціць.  Далей – болей.  У  арміі   адслужыў  у  ваенна-паветраных  сілах,  і  зноў  вярнуўся  ў  калгас.   І  вось  ужо  дзесяць  гадоў  хлебароб.
–  А  вольны  час,  захапленні  ёсць?
– Адпачываем,  калі  ўжо  завершаны  асноўныя  сельгасработы. Люблю  рыбачыць,  як  і  большасць  у  Востраве.  Летась  на  жыўца  спінінгам  вылавіў  сома  каля  6,5  кілаграма.
–  А  сёлетняе  жніво  якое  па  ліку?
–  Першае!  Але  не  комам! (жартуе).  Бу-дзем  працягваць  у  тым  жа  духу!
Вось  так,  ведай  нашых!  Першае  жніво  камбайнерам  – і  трэцяе  месца ў  раённым  спаборніцтве  сярод  маладзёжных  экіпажаў!  Добры   старт  працоўнай  доблесці.
Старшыня  калгаса  Васіль  Васільевіч  Шварц задаволена  канстатуе:  “На  такую  моладзь,  як  Сяргей  Козыр,  робім  стаўку.  Любую  справу  можам  яму  даручыць.   На  жніве  на  камбайне  працаваў, гэта  асноўны  занятак.   А  так  на  трактары  з  навясным  абсталяваннем  яшчэ  паспяваў   падкормкі  накасіць  для  калгаснай  жывёлы,  падгарнуць  збожжа  на  збожжаскладах,  сена  ў  рулонах  у  бурты  паскладваць  і  гэтак  далей.  Актыўны,  ініцыятыўны,  увішны.  Так  што  маладосць  не  загана – перавага!”

Ніна  ІЗОХ.  Фота  аўтара.

Добавить комментарий