АПОШНІЯ ПРЫГАТАВАННІ ДА СВЯТА

На  мінулым  тыдні  адбылося  выязное  пасяджэнне  арганізацыйнага  камітэта  па  падрыхтоўцы  і  правядзенні  раённага  свята  «Дажынкі»  ў  аграгарадку  Новыя  Максімавічы.

Аграгарадок  прыхарошваецца  да  свята.  Ужо  заззяў  свежымі  фарбамі  сельскі  Дом  культуры,  хутка  набудзе  новы  выгляд  фельдшарска-акушэрскі  пункт.  Работнікі  камунальнай  службы  папрацавалі  на  добраўпарадкаванні  вуліц,  прыведзены  ў  парадак  помнік  ахвярам  Вялікай  Айчыннай  вайны  і  прылягаючы  да  яго  парк.  Ва  ўзорным  стане  тэрыторыі  школы  і  дзіцячага  садка.  І  усё ж  старшыня  райвыканкама  Ф. В. Ва-шчыла  зрабіў  шэраг  заўваг,  даў  даручэнні  адпаведным  службам  і  вызначыў  тэрмін   на  ўхіленне  недахопаў  і  агрэхаў.
Святочныя  мерапрыемствы  адбудуцца  ў  суботу,  13  верасня.  Герояў  жніва  і  хлебаробаў,  гасцей  і  ўдзельнікаў  свята  чакае  цікавая  і  разнастайная  культурна-забаўляльная  і  спартыўная  праграма.  Мерапрыемствы  вясковых  «Дажынак»  і  канцэртная  праграма  спланаваны  такім  чынам,  каб  усім  знайшлося  месца  і  забава  па  душы.  А  паглядзець  будзе  што,  ды  і  паўдзельнічаць  у  конкурсах  і  віктарынах,    пачаставацца  адмысловымі  напоямі  на  травах,  набыць  слоік  максімавіцкага  мядку  і  іншую  смакату,  што  прапануюць  спажывецкае  таварыства  і  прыватныя  гандляры,  зможа  кожны,  хто  не  палянуецца  і  прыме  ўдзел  у  раённым  кірмашы  “Дажынкі – 2014”.
Падворкі  ў  старанных  гаспадароў  і  гаспадынь  упрыгожваюць  рознакаляровыя  вясёлкі   з кветак,  у  садах  наліваюцца  сокам  яблыкі,  а  яшчэ  тут  вырас  багаты  ўраджай  бульбы,  гарбузоў,  капусты,  буракоў,  морквы,  памідораў,  цыбулі.   Дбайныя,  гаспадарлівыя  максімаўцы  стараюцца  назапасіць  на  зіму  дары  лесу  і    за  парой  убраць  вырашчаны  ўраджай.

Аліна  СУДНІК.
Фота  аўтара.

Добавить комментарий