Упрыгажэннем і візітнай карткай аграгарадка Заполле стала лясніцтва з экалагічным будынкам, дагледжанай прылягаючай тэрыторыяй
А што гэта сапраўды так, сведчыць яшчэ і той факт, што фотаэцюд з выявай лясніцтва ўпрыгожвае галіновы каляндар на 2014 год, выпушчаны Міністэрствам лясной гаспадаркі Беларусі, у якім сабрана ўсё самае лепшае па галіне.
Летапіс лясніцтва вядзе з 2000 года, а ўзначальвае яго Анатоль Іванавіч Паўленка. Чалавек ён – добры, працаўнік – старанны, а гаспадар – руплівы. Таму жыхары аграгарадка некалькі гадоў запар давяраюць менавіта яму прадстаўляць іх інтарэсы ў мясцовым і раённым Саветах дэпутатаў. За даволі кароткі тэрмін яму разам з калектывам лясніцтва ўдалося стварыць моцную матэрыяльна-тэхнічную базу, належным чынам уладкаваць тэрыторыю, да 65-годдзя вызвалення Беларусі ад нямецка-фашысцкіх захопнікаў заклалі дэндрапарк. На паўгектары высаджана каля тысячы раслін, у тым ліку 30 відаў дрэў, 25 – кустоў. Тут і кедр, сасна, арэх, вяз, яблыні, туі, вербы, ядлоўцы, спірэі, глог (боярышник) і яшчэ мноства іншай прыгажосці. Міне яшчэ некалькі гадоў – зашумяць яны зялёнымі кронамі, і нашчадкі запалянцаў будуць любавацца іх прыгажосцю і смакаваць плады. А пакуль прастора ўхутана снегам, які на сонцы іскрыцца, пераліваецца, ад чаго яшчэ прыгажэй на гэтым фоне выглядаюць густыя рады пірамідальных туй уздоўж дарожак.
На тэрыторыі лясніцтва гэтай восенню ўзведзены яшчэ адзін будынак – выставачны экзэмпляр летняй хаткі, які складаў частку экспазіцыі ДЛГУ “ Клічаўскі лясгас ” на выставе ў Мінску. У ёй плануецца размясціць музей інструментаў, прылад, агрэгатаў і прыстасаванняў, што выкарыс-тоўваліся ў лясной гаспадарцы з сівой даўніны. Некалькі экзэмпляраў будучай экспазіцыі ўжо ёсць у наяўнасці, а пілы-двухручкі, бензапілы “Урал” і “Дружба” перадалі дбайныя гаспадары Заполля, якім важна, каб пакаленне камп’ютарнага веку ведала пра тое, як і з якімі прыладамі ды інструментамі працавалі іх продкі.
Эканамічныя паказчыкі – галоўны крытэрый працы. Таму калектыў імкнецца іх выконваць. Так, за мінулы год выручка лясніцтва склала 260 144 350 рублёў, што амаль на сто мільёнаў больш, чым у папярэднім годзе.
Больш як на 42 гектарах выкананы адпаведныя работы, што дазволіла перавесці іх у лясныя культуры. Насельніцтву аказаны паслугі на суму больш за 34 000 000 рублёў, адпушчана 2289 кубічных метраў дроў, задавальняўся попыт на дзелавую драўніну. Забяспечваюцца дрывамі і дзелавой драўнінай як насельніцтва, так і арганізацыі, прадпрыемствы, да таго ж у ліку спажыўцоў лясных рэсурсаў яшчэ і Кіраўская жыллёва-камунальная гаспадарка.
Застаецца дадаць, што ў лясніцтве працуе 21 чалавек. Лепшых вытворчых паказчыкаў дасягаюць: вальшчык Мікалай Ула-дзіміравіч Казлоўскі, трактарыст на тралёўцы Генадзь Вітальевіч Канойка, ляснік Аркадзь Васільевіч Пірожнік.
Аліна СУДНІК.