10  гадоў  таму,  27 студзеня  2004  года,  у  СШ №1  Краснаполля  здарылася  трагедыя:  абваліліся   жалезабетонныя  перакрыцці  ў  спартыўнай  зале,  прыбудаванай  да  школы.
У  тую  раніцу  на  ўроках  фізічнай  культуры  тут  знаходзіліся  47  вучняў  9-10  класаў  і  трое  настаўнікаў.  У  момант  абрушэння    дзеці  гулялі  ў  валейбол  і  баскетбол.  Як  пазней  яны  расказвалі,  іх  настаўнік  Пётр  Любашэнка  выбіў  нагой  дзверы,  якія  заклініла,  і  дапамагаў  у  эвакуацыі  дзяцей…  Сам  жа  і  3  дзяцей  загінулі…
У  памяць  аб  настаўніку  фізічнай  культуры  Пятру  Васільевічу Любашэнку  ў  УА “Краснапольская  раённая  дзяржаўная  гімназія”   штогод  ладзяць  валейбольныя  турніры.  Працягваюць  справу  выдатнага  чалавека  і  настаўніка, які  сам  усё  жыццё  захапляўся  рознымі  відамі  спорту,  выхаваў  не  адно  пакаленне  аматараў  фізічнай  культуры  і  спорту  Краснаполля.  Валейбол  жа  выдзяляў асобна,  лічыў,  што  ён   не  толькі  загартоўвае   дух   удзельнікаў  спаборніцтва,  але  і  выхоўвае   такія  якасці,  як  лідарства  і  воля  да  перамогі. Ён  сам  быў  выдатным  іграком,  вучыў  гэтаму  сваіх  вучняў.
Любоў  да  спорту  прывіў  і  свайму  сыну  Сяргею.   Сёлета   разам  з  маці,  Ліліяй  Рыгораўнай,  жонкай  і  дзецьмі  Сяргей  Пятровіч  Любашэнка  (жыхар  Клічава,  працуе  ў  ТДА ”Элефант”)  прыехалі  ў  гімназію,  каб  ушанаваць  памяць  аб  настаўніку  і  дзецях,  якія  загінулі  ў  спартыўнай  зале  гэтай  установы. Сяргей Пятровіч  ад-крыў  спаборніцтвы,  падзякаваў  удзельнікам  турніру  за  працяг  справы  яго  бацькі  і  пажадаў  усім  поспеху.
Як   і  штогод,  у  сёлетніх  спаборніцтвах   удзельнічалі   каманды  з Магілёўшчыны  і суседніх  рэгіёнаў  Расіі.  Прадэманстраваць  сваю  адданасць  валейболу, так  як  гэта  рабіў  Пётр  Васільевіч,  паказаць  лепшую  гульню  прыехалі  зборныя  каманды Касцюковіцкага,  Краснапольскага, Чавускага,  Хоцімскага  раёнаў,   Краснагорскага  раёна  Бранскай  вобласці  і  зборная  каманда  Бранскай  вобласці  (Расійская  Федэрацыя).  Упершыню  ў  турніры   ўдзельнічала  маладзёжная  каманда  з  Клічаўскага  раёна.  У  складзе  яе  гулялі  адны  з  мацнейшых  нашых  валейбалістаў – браты  Іван  і  Міхаіл  Каляда,  Іван  Кароткі  з  Максімавіч,  Сяргей  Скудны,  Яўген  Калінін,  Арцём  Ільін,  браты  Ілья  і  Раман  Коўрыкі  з  Арэхаўкі  (апошні – капітан  каманды).  Гульні  праходзілі  па  кругавой  сістэме.  Поспех  садзейнічаў  нашым  землякам,  яны  прадэманстравалі   зладжаную  яркую  гульню  і  сталі  пераможцамі  турніру,  абышоўшы  мацнейшых  сапернікаў –  каманду  расіян,  якая  5  гадоў  запар атрымлівала тут вікторыю.  Узнагарода пераможцам – пераходны  Кубак  і  дыплом.  Але  галоўным  вынікам  спартыўных  спаборніцтваў  можна  лічыць  тое,  што  з  кожным  годам  большае  колькасць  удзельнікаў  гэтага  валейбольнага  турніру,  расце  іх  жаданне  сустрэцца  на  валейбольнай  пляцоўцы,  а  таксама  мацнеюць  сяброўскія  сувязі  паміж  рэгіёнамі.

Наш  карэспандэнт.
На  здымку:  каманда-пераможца    валейбольнага  турніру.

У  верхнім  радзе  трэці  злева –  С. П. Любашэнка.