“Настаўнік вучыць паспяхова да таго часу, пакуль вучыцца сам”. Гэтыя словы К. Дз. 
Ушынскага актуальныя ва ўсе часы. Адукацыя ж – працэс бесперапынны. Мяняецца свет – мяняюцца дзеці, што ў сваю чаргу патрабуе новых падыходаў да кваліфікацыі педагога.
Якраз з мэтай павышэння ўзроўню прафесійнага майстэрства педагогаў, абмену эфектыўнымі методыкамі, формамі, метадамі і прыёмамі навучання і выхавання Магілёўскі дзяржаўны абласны інстытут развіцця адукацыі арганізаваў у снежні мінулага года фестываль эфектыўнага педагагічнага вопыту. удзел у ім прынялі педагогі тых устаноў агульнай сярэдняй адукацыі, якія з’яўляюцца апорнымі школамі па фарміраванні, вывучэнні і абагульненні перадавога педагагічнага вопыту ў 2010 – 2013 гадах.
На фестываль свае работы прадставілі і настаўнікі Клічаўшчыны, якія апісалі, абагульнілі лепшы вопыт работы тых школ, дзе працуюць. Так, настаўніца матэматыкі Ала Аляксандраўна Шакола падрыхтавала матэрыялы аб выкарыстанні камп’ютарных тэхналогій у адукацыйным працэсе ў СШ №1; завучы па вучэбнай рабоце Таццяна Аляксандраўна Варакса і Наталля Іванаўна Кніга – аб сістэме работы з таленавітымі і адоранымі навучэнцамі ў СШ №2; намеснік дырэктара па вучэбна-выхаваўчай рабоце Галіна Антонаўна Маслакова – аб сістэме экалагічнага выхавання навучэнцаў у Максімавіцкай СШ; намеснік дырэктара па вучэбнай рабоце Дзмітраўскага вучэбна-педагагічнага комплексу «Дзіцячы сад – сярэдняя школа» Наталля Сямёнаўна Счыслёнак – аб сістэме метадычнай работы ва ўстанове адукацыі па развіцці прафесійнай кампетэнтнасці педагагічных работнікаў.
Трэба адзначыць, што работа секцый фестывалю праходзіла па розных тэматычных кірунках, у якіх падчас канферэнцый і выступалі аўтары, абаранялі свае работы. У прыватнасці, вопыт работы СШ №2 прадставіла яе дырэктар Таццяна Вікенцьеўна Белабародая.
Перадавы педагагічны вопыт настаўнікаў Клічаўшчыны атрымаў заслужаную высокую ацэнку. Усе чатыры даклады аб рабоце вышэйназваных школ раёна, згодна з рашэннем рэдакцыйнага савета, адабраны і ўвайшлі ў зборнік матэрыялаў работы фестывалю. Агульнавядома, што абмен вопытам – залог поспеху.
Валянціна Ерафеева,
загадчык раённага вучэбна-метадычнага кабінета аддзела адукацыі, спорту
і турызму райвыканкама.