Чараўніцтва каляднай зоркі
Каляды – гэта заўсёды добрая нагода для прымірэння, выказвання шчырых чалавечых і сямейных пачуццяў, а яшчэ для многіх людзей Нараджэнне Хрыстова стала сімвалам далучэння да адвечных каштоўнасцей хрысціянскага жыцця і духоўнасці.
У гэтыя светлыя, святочныя дні стала добрай традыцыяй ладзіць у раённым Доме культуры духоўна-мастацкае свята “Калядная зорка”. Апоўдні 7 студзеня, перш чым трапіць у глядзельную залу, усе з інтарэсам разглядалі тэматычную выставу дэкаратыўна-прыкладнога мастацтва, да якой вучні дзіцячай школы мастацтваў і яе філіялаў рыхтаваліся зараней: малявалі віншавальныя паштоўкі, стваралі сваімі ўмелымі рукамі вырабы з гліны, з прыродных і падручных матэрыялаў, вышывалі, ткалі, вязалі з нітак, шылі цацкі, лялькі, вопратку на іх і г. д. Не засталіся ўбаку і народныя ўмельцы, майстры Дома рамёстваў. Яны, як заўсёды, парадавалі мноствам арыгінальных вырабаў.
Усе, хто прыйшоў на калядныя сустрэчы, ніколькі не па-шкадавалі, бо атрымалі цэлае мора станоўчых эмоцый і ўражанняў не толькі ад выставы работ майстроў , а і цудоўнага канцэрта духоўнай музыкі. Чыста, нібы струменьчык вады ў святой крыніцы, пераліваліся дзіцячыя галасочкі. Юныя клічаўляне і дарослыя славілі нараджэнне Ісуса Хрыста і прымушалі гледачоў ацаніць свае думкі, пачуцці, усе свае схільнасці перад абліччам Вечнага Жыцця. У святы дзень нараджэння Богадзіцяці песнапенні гучалі асабліва пранік-нёна, заклікалі нас стаць на бок мудрасці і прастаты, адкінуўшы грахоўныя думкі і звычкі, азарыцца святлом Віфліемскай зоркі.
Аліна Суднік.