Зямля, дзе пачаўся твой лёс

14  верасня  эстафету  святаў  вёскі Клічаўшчыны  прымаў  Стары  Востраў.  Здавалася,  старажытнае  паселішча  з  больш  за  500-гадовай  гісторыяй  у  гэты  дзень  памаладзела  ад   сустрэчы  са  сваімі  сынамі  і  дачкамі,  якія  сёння  тут  жывуць, і   шматлікімі  гасцямі,   ад  добрых  слоў,  усмешак,  музыкі  і  песень,  ад  па-сямейнаму  шчырай   атмасферы  свята.
Чым  багаты і  моцны  чалавек?  Сваімі  каранямі,  а  яны  тут,  у  гэтай  шчодрай  зямлі,  бо для  многіх  выйшла  так,  што  дзе  нарадзіўся,  там  і  згадзіўся.   Добрым  людзям –  гонар  і  павага,  а  ўсе разам  яны – сузор’е  дабра,  поспеху,  славы.  Таму  і  ўшаноўвалі  людзей,  працоўныя  калектывы     “зоркамі”!   Напрыклад,  у  знак  удзячнасці  за  разумнае,  добрае,  вечнае  калектыў  мясцовай  школы  ўзнагародзілі  зоркай  “Навучанне – свет”,  а  зоркі  “Моцны  гаспадар”  адрасаваліся  фермеру  з  вёскі  Акцябрск  Мікалаю  Ануфрыевічу  Шаблінскаму  і  жыхару  Старога  Вострава  Генадзю  Аляксандравічу  Каліноўскаму.  Не  забыліся  землякі  і  аб  тых  аднавяскоўцах,  якія  зараз  годна выконваюць  свой  воінскі абавязак  перад  Радзі-май.  У  арміі  служаць    Арцём  Чэрап,  Андрэй  Вікторчык,  Вадзім  Шпак,  Максім  Яновіч,  Аляксандр   Шаўчонак  і  Сяргей  Кавалёў.  Іх  матулям былі  ўручаны  зоркі  “Доблесць”.  Зоркай  “Шматдзетная  маці”  была  адзначана  Алена   Сяргееўна  Панькова,  якая  нарадзіла  і  выхоўвае  пяцёра  дзетак,  старэйшай  з  іх –  Юліі – 19  гадоў,  а  меншая,  Амалія,  яшчэ  немаўля.  Дарэчы,  Стары  Востраў  ніколькі  не  стары,  бо  ў  сем’ях  нараджаецца  малеча.  Толькі  за  мінулы  год  тут  з’явілася  на  свет  8  малышоў,  а  калі  дадаць  яшчэ  тых нованароджаных,  якія  гасцююць  ў  мясцовых  дзядуляў  ды  бабуль,  то  атрымаецца  добрая  ясельная  група.  Арганізатары  свята  пастараліся  нікога з  іх  не  абысці  ўвагай,  парадаваць  хоць  маленькім  сувенірам.
Сям’я – апора грамадства,  яго  каштоўнасць.  Вось  і  на  гэтым  свяце  зоркай  “Узаемаразуменне”  адзначылі  тых,  хто  ў  згодзе  і  ладзе  пражылі  разам  10,  15,  20, 25  гадоў,  сярод  30-гадовых  юбіляраў – сем’і  Святланы  Іванаўны  і  Уладзіміра  Мікалаевіча  Дзюко,  Валянціны  Рыгораўны  і  Сергея  Аляксандравіча  Гарбуз.  Дарэчы,  якраз  у  гэты  дзень  у  Востраўскім  сельскім  савеце  нарадзілася  яшчэ  адна  маладая  сям’я – ва  ўрачыстых  абставінах  у  шлюб  уступілі  Вольга  Мухіна і  Сяргей  Сыравежкін.
У  добрай  сям’і  і  падвор’е  ўзорнае,  і  гаспадары  ашчадныя.  Зоркі  “Лепшы  дом”  у  Востраве  прысуджаны  Любові  Сяргееўне  і  Фёдару  Рыгоравічу  Баравік,   “Лепшая  гаспадыня” – Але  Іванаўне   Лебедзь,  якая  славіцца  сваімі  караваямі  ды  пірагамі.
Шырокім  і  раздольным  атрымалася  свята  вёскі.  Працавала  выстаўка  работ  мясцовых  майстрых-вышывальшчыц  Валянціны  Якаўлеўны  Баяравай  і  Зінаіды  Мікалаеўны  Любчык. Розныя  ласункі  прапанавала  “Бабуліна  кухня”.  Вясковая  малеча  ўволю  наскакалася  на  батутах,  насмакавалася  салодкай  ваты.  Прыватныя   прадпрымальнікі  разгарнулі  тут  гандаль.
Калі  ў  хаце  свята,  то  без  музыкі,  песень,  танцаў  не  абысціся!  Іх  са   сцэны  дарылі  вяскоўцам  удзельнікі  мастацкай  самадзейнасці  Востраўскага  сельскага  Дома  культуры,  народны  вакальны  ансамбль  “Прасніца”  Слабодскага  сельскага  клуба,  вакальна- эстрадны  ансамбль  “Мелодыя”  раённага  Дома  культуры.  Кожнае  выступленне  знаходзіла  гарачы  водгук  у гледачоў.  Людзі  танцавалі,  весяліліся  да  самай  цемры,  бо  працягам  свята  была  “Дыскатэка 80-х”,  якую правялі  работнікі  РДК.   Ды  яно  і  зразумела:  закончана  жніво,  бульбу  пакапалі,  у  восень –  работ  восем,  але  душа  прагне  прыгажосці!

Ніна  Ізох.

Добавить комментарий