Сіроты пры жывых бацьках
На пытанні адказвае Валянціна Сяргееўна КЛЕПЧА, дырэктар раённага сацыяльна-педагагічнага цэнтра.
НАША ДАВЕДКА
Валянціна Сяргееўна КЛЕПЧА
Скончыла Магілёўскі педагагічны каледж, Магілёўскі дзяржаўны ўніверсітэт імя А. Куляшова, Акадэмію паслядыпломнай адукацыі, дзе набыла дасканалыя веды ў галіне практычнай псіхалогіі.
Настаўніца пачатковых класаў, педагог-псіхолаг, кансультант.
Замужам, мае трохгадовага сына Арсенія.
Жыццёвае крэда педагога: зрабіць жыццё дзяцей лепшым.
Сацыяльнае сіротства, або сіроцтва пры жывых біялагічных бацьках. На вялікі жаль, з’ява даволі распаўсюджаная ў нашым грамадстве. Не выключэнне і наш раён. У 2006 годзе тут быў створаны дзіцячы сацыяльны прытулак, які ў 2012 годзе рэарганізаваны ў раённы сацыяльна-педагагічны цэнтр. За гэты час тут прайшлі рэабілітацыю 273 чалавекі, у асноўным дзеці ва ўзросце ад 3-х да 18 гадоў.
Толькі згодна з Дэкрэтам Прэзідэнта № 18 у гора-бацькоў было адабрана 130 хлопчыкаў і дзяўчынак. 25 чалавек пазбаўлены бацькоўскіх правоў у адносінах да 37 дзяцей. 87 дзетак вернуты ў біялагічныя сем’і, 8 займелі апякунскую сям’ю, 6 – прыёмную, 8 выхоўваюцца ў доме сямейнага тыпу, 17 – у дзяржаўных установах. Узначальвае цэнтр Валянціна Сяргееўна Клепча.
— Валянціна Сяргееўна, на Вашу думку, чаму ў нашым грамадстве не менее дзяцей-сірот пры жывых бацьках? Што ляжыць у аснове сямейнай безадказнасці і нядобранадзейнасці?
– У ліку значымых для чалавека каштоўнасцей адна з самых важных, канечне ж, сям’я. На вялікі жаль, быць татамі і мамамі нідзе не вучаць. Кожны чалавек набывае вопыт сямейнага жыцця ў бацькоўскім доме і потым пераносіць існуючую мадэль у сваю сям’ю. Добра, калі чалавек удумліва падыходзіць да стварэння сям’і і імкнецца будаваць уласную па нейкіх правілах і канонах, калі адбірае ўсё самае лепшае ад бацькоў і роду свайго, калі зацікаўлены стварыць няхай не ідэальную, але вельмі спрыяльную атмасферу ў доме, дзе камфортна ўсім членам сям’і. Ніхто не кажа, што гэта проста і лёгка. Гэта вельмі цяжкая паўсядзённая карпатлівая праца мужоў і жонак, татаў і маці, сыноў і дачок, дзядуляў і бабуль, у ролі якіх на розных этапах жыцця кожнаму абавязкова давядзецца пабыць.
Тыя, хто не здольны да самааналізу і крытычнага ўспрымання сябе і ўсяго, што адбываецца наўкола, хто не задумваецца над наступствамі тых або іншых дзеянняў, хто плыве па цячэнні і не прыкладае намаганняў пераадольваць цяжкасці, знахо-дзяць выйсце ў спіртных напоях. Менавіта алкагалізм бацькоў і ёсць галоўная прычына дзіцячай бяды і сіротства. Дарэчы, у нашым банку даных зарэгістравана 34 сям’і, у якіх 76 непаўналетніх знаходзяцца ў сацыяльна небяспечным станові-шчы.
– Раскажыце, калі ласка, якім чынам выяўляюцца такія сем’і?
— Сігналы аб цяжкім або небяспечным становішчы ў сям’і паступаюць да нас або ў камісію па справах непаўналетніх ад нераўнадушных людзей, ад педагогаў, работнікаў службаў, сельвыканкамаў. Так, летась нам паступіў 71 сігнал аб сямейнай нядобранадзейнасці, і толькі ў 8 выпадках інфармацыя не пацвердзілася. Сёлета ўжо маем 28 паведамленняў. Па кожным выпадку спецыялістамі нашага цэнтра вядзецца спецыяльнае расследаванне, да якога прыцягваюцца спецыялісты іншых службаў і ведамстваў: педагогі, медыкі, інспектары інспекцыі па справах непаўналетніх, супрацоўнікі аддзела па надзвычайных сітуацыях і сельвыканкамаў.
– Валянціна Сяргееўна, думаю, што не ўсе людзі могуць самастойна справіцца з нейкімі жыццёвымі калізіямі. Адным не хапае смеласці, іншым – упэўненасці быць зразумелымі, трэцім проста няма з кім падзяліцца сваёй праблемай. Знаёмства з Вамі дае падставы сцвярджаць, што Вы не проста вельмі адукаваны ў сваёй галіне спецыяліст, а і высокакласны практыкуючы псіхолаг, валодаеце тэхнікай пясочнай тэрапіі. Што можаце прапанаваць насельніцтву раёна?
– Па-першае, дзякуй за такую ацэнку, а па-другое, у наш цэнтр можа звярнуцца кожны жыхар раёна з любым пытаннем і атрымаць кваліфікаваную псіхалагічную кансультацыю як у прыватнай гутарцы, так і па тэлефоне 50– 888.
– Дзякуй за змястоўную гутарку, поспехаў у працы Вам і ўсяму калектыву цэнтра.
Мне застаецца дадаць: па тэлефонах 50-797 і 51-222 можна паведаміць аб фактах сямейнага насілля, злоўжывання алкаголем, нядобрасумленным выкананні бацькоўскіх абавязкаў або аб фактах жорсткага абыходжання з дзецьмі. Не будзьце раўнадушнымі і па магчымасці дапамажыце дзецям, над якімі навісла бяда ці небяспека.
Аліна СУДНІК.