Ноч музеяў у Клічаве
Год ад году расце колькасць аматараў і прыхільнікаў нашай спадчыны, якія з задавальненнем цёплым майскім адвячоркам збіраюцца разам, каб адзначыць ноч музеяў.
На гэты раз гасцей сустракалі і ўвесь час забаўлялі сам пан Незабытоўскі з жонкай, ролі якіх бліскуча выканалі Павел Міхнёнак і Алеся Савасціёнак. Задумка аўтара сцэнарыя Наталлі Храмянковай і яе калег была цікавай, насычанай і пазнавальнай.
Жывая музыка ў выкананні народнага аркестра народных інструментаў пад кіраўніцтвам Уладзіміра Сураўца, чароўныя галасы салістак ансамбля “Шчодра” Наталлі Коктыш і Юліі Галдыбан, прызнанага майстра песеннай культурнай спадчыны Вольгі Мацюшонак цешылі слых і дарылі радасць і добры настрой усім прысутным. Вершы з натхненнем чытала Тамара Кузьміч. Вельмі прыемна, што многія таты і мамы прывялі з сабой дзяцей, якім было не менш цікава, чым дарослым.
Пасля невялікага канцэрта на свежым паветры і цырымоніі ўзнагароджвання аматараў музейнай справы, у ліку якіх Лідзія Ачыновіч, намеснік дырэктара Цэнтра дзіцячай творчасці, Ірына Дзюко, настаўніца СШ № 1, Вікторыя Харкова, вучаніца СШ № 1, Андрэй Гаварушка, Наталля Касуха, гасцей запрасілі наведаць музейныя экспазіцыі. Арганізатары пастараліся і зрабілі экскурсію на залах храма гістарычнай спадчыны відовішчнай. А ажыццявіць ідэю экскурсаводам Людміле Русецкай і Таццяне Касцюкевіч дапамаглі ўдзельнікі народнага дзіцячага фальклорнага ансамбля “Купалачка”, заслужанага аматарскага нкалектыву Рэспублікі Беларусь ансамбля народнай музыкі і песні “Жытніца”, супрацоўнікі ўстаноў культуры: Тамара Астроўская, Таццяна Баранава, Валянцін Кавалёў, Дар’я Барзунова, Марына Сакалова.
У адной з залаў былі арганізаваны майстар-класы па вырабе разнастайных падзелак і сувеніраў дэкаратыўна-прыкладнога мастацтва, якія правялі Валянціна Нікіціна, кіраўнік народнага аматарскага калектыву “Спадчына” РДК, Вячаслаў Шчэпетаў, мастак-аматар, Уладзімір Дзяржанскі, майстар на ўсе рукі.
Пан Незабытоўскі нагадаў усім прысутным аб тым, што самай вялікай каштоўнасцю ва ўсе часы была і застаецца сям’я. Ад імя райвыканкама 21 сям’я атрымала падарункі і словы шчырай прызнальнасці за захаванне сямейных традыцый і выхаванне дзяцей. Падарункі ў розных намінацыях, напрыклад, такіх, як самая спартыўная, самая творчая, самая маладая, дружная, моцная і т. п., атрымалі сем’і Валянціна і Лізаветы Кавалёвых, Сяргея і Вольгі Лапко, Дзмітрыя і Алены Бялягіных, Юрыя і Дзіяны Лук’янавых, Аляксея і Вольгі Дабрыгіных, Сяргея і Святланы Акулічаў, Аляксандра і Таццяны Дзегцяронкаў, Андрэя і Марыны Лосевых, Ігара і Алены Клеўжыцаў, Васіля і Валянціны Нікіціных. А выканаў гэту прыемную місію Уладзімір Ваакс, начальнік аддзела культуры райвыканкама.
Навуковы супрацоўнік Юлія Чухінская прадставіла ўвазе прысутных звесткі аб калекцыі халоднай зброі, якую музей займеў літаральна на днях, і прадэманстравала меч Саламона.
Бодзі-арт, або мастацтва ўпрыгожвання твару з дапамогай дэкаратыўных элементаў, карыстаўся вялікай папулярнасцю ў малодшага пакалення клічаўлян. Непераўзыдзеныя шэдэўры на тварах не толькі дзетвары стварала таленавітая мастачка Алена Пятруша. Не менш зацейлівымі і разнастайнымі былі прычоскі юных модніц, косы якім цэлы вечар пляла цырульнік Маша Садаводава.
Жывая музыка ў музеі гучала да ночы, а потым неба над горадам азарылася рознакаляровым феейверкам. У добрым настроі задаволеныя ўдзельнікі мера-прыемства вярталіся дадому, каб праз год зноў правесці не менш цікавую ноч разам з захавальнікамі гістарычнай спадчыны і таленавітымі людзьмі нашага славутага і самабытнага краю.
Аліна СУДНІК.