Бяспека руху на аўтатрасах Р-62 Чашнікі-Бобр- Бабруйск, Р-79 Клічаў-Чачэвічы, Р-118 Любонічы- Кіраўск залежыць ад калектыву лінейна-дарожнай дыстанцыі № 724 ДЭУ-72
Няхай добрым будзе шлях!
Амаль 110 кіламетраў аўтамагістралей рэспубліканскага значэння абслугоўвае калектыў лінейна-дарожнай дыстанцыі № 724 ДЭУ-72.
Як адзначае начальнік ЛДД-724 Міхаіл Міхайлавіч Серы, галоўная каштоўнасць прадпрыемства – людзі. Кожнаму з 19 членаў калектыву ўласцівы прафесіяналізм, руплівасць, настойлівасць. Без гэтых якасцей у дарожнай галіне і рабіць нечага.
Сяргей Эдуардавіч Стасевіч на прадпрыемстве працуе 6 гадоў і ўвесь час машыністам пагрузчыка “Амкадор”, спаўна зведаў “хлеба” дарожнікаў. Толькі сёлетняя зіма строгі экзамен на прафесіяналізм ўчыніла. Рабочы дзень пачынаўся ў 3 га-дзіны ночы і заканчваўся назаўтра ў такі ж час. Трохі адпачыў – і зноў за справу! Бо яшчэ зацемна трэба было загружаць дарожную тэхніку пясчана-салянай сумессю для пасыпкі дарожнага палатна. А як зіма снягамі пужала! Бывала, так замяце аўтатрасу, што толькі яго “Амкадор” і можа “прабіць” яе, пашырыць праезную паласу. А пасля ўжо, за ім, ідзе іншая дарожная тэхніка, расчышчае дасканала, наводзіць парадак, чысціню, бо і ў зімку староннія прадметы на дарозе, якія могуць стаць прычынай надзвычайных здарэнняў, — нярэдкасць.
Цяпер вясна, а значыць, на парадку дня – рамонт асфальтавага пакрыцця аўтадарог, мастоў, замена пашкоджаных дарожных знакаў, нанясенне разметкі, добраўпарадкаванне павільёнаў прыпынку і іншых аб’ектаў. Свой уклад у гэту неабходную людзям справу ўносіць штодня і Сяргей Эдуардавіч. Ён там, дзе размыла дарогу, дзе патрэбна разгарнуць зямлю ў час рамонту аўтатрасы, выканаць пагрузачныя работы і г.д. Таму яго пагрузчык практычна ніколі не прастойвае.
А з тэхнікай ён на “ты”, любіць яе і беражэ. Ды і як інакш? Працаваць пачаў з 16 гадоў механізатарам у саўгасе. У арміі служыў у аўтабатальёне. Дома таксама стальны сябар ёсць – нямецкі “Фольксваген Шаран”. На ім з сям’ёй, сябрамі ў падарожжах бывае, і на рыбалку на Друць, Беразіну ездзіць. Гэта яшчэ адно захапленне з дзяцінства. З задавальненнем гаворыць, што самы вялікі яго ўлоў на вудачку – 2-кілаграмовыя ляшчы.
Як і многія, Сяргей Эдуардавіч лічыць, што аўтамабіль – не раскоша, а сродак перамяшчэння. Прыемна, калі пад яго коламі якасная дарога, чыстая, у поўным парадку, тым больш тая, што на абслугоўванні іх прадпрыемства. Бо дарогі – твар любога горада, як яны выглядаюць, так мяркуюць і аб яго жыхарах.
Ніна Ізох.