Памяць аб Машэраве жыве
У лютым гэтага года споўнілася 95 гадоў з дня нараджэння Пятра Міронавіча Машэрава – віднага дзяржаўнага і партыйнага дзеяча, Героя Савецкага Саюза і Героя Сацыялістычнай Працы.
Пятнаццаць гадоў П. М. Машэраў узначальваў Цэнтральны Камітэт Камуністычнай партыі Беларусі. Гэта былі гады росквіту рэспублікі. Па вытворчасці многіх відаў прамысловай прадукцыі і харчовых тавараў на душу насельніцтва яна займала вядучыя месцы не толькі ў Савецкім Саюзе, але і ў свеце. Беларусь называлі зборачным цэхам для многіх галін прамысловасці ўсяго Савецкага Саюза. У той час былі пабудаваны такія гіганты прамысловасці, як «Хімвалакно» ў Магілёве, «Азот» у Гродна, іншыя аб’екты ў Мінску, Гомелі, Віцебску.
Вялікую ўвагу Пётр Міронавіч удзяляў увекавечанню подзвіга савецкага народа ў гады Вялікай Айчыннай вайны. Візітнай карткай Беларусі для яе гасцей, шматлікіх турыстаў і для ўсяго нашага народа сталі Брэсцкая крэпасць-герой, Курган Славы, Хатынь.
Па ініцыятыве Цэнтральнага Камітэта Кампартыі Беларусі ў Мінску, Віцебску, Брэсце прайшлі мерапрыемствы па ўшанаванні памяці вялікага сына беларускага народа. Гэта дата не засталася па-за ўвагай ідэалагічнага аддзела райвыканкама, раённых арганізацый КПБ, Савета ветэранаў вайны і працы, ГА БРСМ, педагагічнага калектыву Клічаў-скага дзяржаўнага аграрна-тэхнічнага каледжа.
На днях у РДК была нала-джана сустрэча прадстаўнікоў гэтых арганізацый з навучэнцамі каледжа. Выступаючыя: Вікенцій Максімавіч Сазонаў, старшыня раённай ветэранскай арганізацыі, Ніна Сцяпанаўна Кляўко, ветэран Камуністычнай партыі, – гаварылі аб дзелавых і маральных якасцях Пятра Міронавіча, аб тым, які след пакінуў ён пасля сябе на беларускай зямлі.
У заключэнне сустрэчы быў прадэманстраваны дакументальны фільм пра П. М. Машэрава «Прызнанне».
Аліна СУДНІК.