Клічаў зноў у ліку пераможцаў!
Для работнікаў лесу з Клічаўшчыны за нязменнае правіла – быць у ліку пераможцаў абласной галіновай спартакіяды. Свой высокі ўзровень нашы спартсмены зноў пацвердзілі, у гэты раз на абласной зімняй спартакіядзе прадпрыемстваў лясной гаспадаркі, якая адбылася 11-12 студзеня 2013 года на базе ДЛГУ «Магілёўскі лясгас» і ў якой удзельнічалі 13 каманд з лясгасаў Магілёўшчыны.
У выніку ўпартых і бескампрамісных спаборніцтваў на лыжнай трасе каманда ДЛГУ “Клічаўскі лясгас” заваявала 2-е агульнакаманднае месца. У яе складзе выступалі: станочнікі дрэваапрацоўчых станкоў лесапункта Сяргей Акуліч, Іван Сушко і Марыя Гузава, ляснік Бёрдаўскага лясніцтва Васіль Шамаль, эканаміст Кацярына Ачыновіч, памочнік ляснічага Патоцкага лясніцтва Валянціна Крыскевіч.
Лаўры перамогі ў абласной спартакіядзе (ужо не першы год) заваявалі ў асабістым першынстве лепшыя лыжнікі раёна і вобласці – Кацярына Ачыновіч (сярод жанчын) і Сяргей Акуліч (сярод мужчын).
У жаночай эстафеце нашы лыжніцы Марыя Гузава, Валянціна Крыскевіч і Кацярына Ачыновіч – на другой пазіцыі, а каманда ў складзе Івана Сушко, Васіля Шамаля, Сяргея Аку-ліча ў мужчынскай эстафеце – на трэцяй.
Па выніках спаборніцтваў каманда прадпрыемства ўзнагароджана Кубкам, Дыпломам ІІ ступені, заахвочана матэрыяльна. А лідарам лыжных гонак у асабістым заліку і эстафеце ўручаны дыпломы адпаведнай ступені, медалі і грашовыя ўзнагароджанні.
Прыемна адзначыць, што ўзровень клічаўскіх лыжнікаў застаецца на ранейшым высокім узроўні. Сведчаннем таму – запрашэнне Кацярыне Ачыновіч і Сяргею Акулічу выступіць у складзе зборнай каманды Магі-лёўскага ДВЛГА ў рэспубліканскай галіновай спартакіядзе, якая адбудзецца 1-2 лютага. А 17-23 лютага ўжо ў складзе каманды Міністэрства лясной гаспадаркі Рэспублікі Беларусь яны выйдуць на старты 45-х Еўрапейскіх лясных лыжных гонак, якія будуць праходзіць у мястэчку Дэльніцэ Рэспублікі Харватыя. Так трымаць, калегі!
Святлана Чарэйчык,
намеснік дырэктара ДЛГУ “Клічаўскі лясгас” па ідэалагічнай рабоце.