“Клічаўскі лясгас”: Задачы пастаўлены. Дзейнічаць!
Суровая сёлета зіма, з маразамі ды снегападамі. Чалавек да такіх умоў прыстасоўваецца, а лясным жыхарам цяжка прыходзіцца. І ў першую чаргу дзікам, бо іх падножны корм – пад вялізным снежным пластом. Вось тут на дапамогу братам нашым меншым і прыходзіць чалавек.
Лесапаляўнічая гаспадарка ДЛГУ “Клічаўскі лясгас” займае 130 тысяч гектараў, з іх пакрыта лесам 79,5 тысячы. А ляснога насельніцтва тут нямала. Дарэчы, яго “перапіс” праходзіць штогод у гэтыя дні па слядах, што пакінуты звярамі на снезе. Іх егеры чытаюць, як раскрытую кнігу. Згодна з улікам распаўсюджаны на Клічаўшчыне тыя ж дзікі, алені, касулі, ласі, лісы, зайцы, водзяцца нават рысі. Зіма для іх – час і халодны, і галодны. Таму для многіх відаў звяроў лясныя падкормачныя пляцоўкі як выратавальны круг. Цяпер у гаспадарцы 44 такія “сталоўкі”, ды яшчэ 7 часовых пляцовак (бо да асноўных часам не даехаць з-за глыбокага снегу). На корм ідзе сена, якое нарыхтавалі ўлетку егеры, і збожжа, а ў саланцы соль засыпаецца як мінеральная падкормка. Так, за 2012 год для падкормкі звяроў зрасходавана 42 тоны аўса ды яшчэ каля 200 тон збожжаадходаў, якія купляюцца ў сельгас-арганізацыях. Дарэчы, на тэрыторыі лесапаляўнічай гаспадаркі ёсць 5 біятэхнічных комплексаў, побач з якімі абсталяваны падкормачная пляцоўка, кармасховішча, саланцы і паляўнічая вышка.
Ёсць багатая фаўна – развіваецца паляўнічая галіна, адна з фінансавых крыніц лясгаса. Таму на прадпрыемстве арганізацыі паляўнічых тураў, у тым ліку для замежных грамадзян, надаецца вялікае значэнне. Зараз лясгас будуе Дом паляўнічага, які па зручнасці і камфорту будзе адпавядаць усім патрабаванням. Значыць, турыстычныя паслугі будзем прапаноўваць на рынак больш актыўна. А пакуль за мінулы год у лесапаляўнічай гаспадарцы было арганізавана 6 паляўнічых тураў для замежных грамадзян, з той жа Германіі і Расіі. Задавальненне гэта для іх не таннае. Напрыклад, адзін трафейны дзік абыходзіцца іншаземцу да 1 тысячы еўра, нашым суайчыннікам – у 5-6 разоў танней.
Хацелася б адзначыць, што штогод устанаўліваецца квота жывёлы, якую можна забраць з прыроды. Ва ўгоддзях ліміты скончаны – закрываецца і паляванне на пэўны від жывёлы. Парушэнне гэтага цягне за сабой крымінальную адказнасць.
Ахова насельнікаў лесу, кантроль за выкананнем паляўнічага заканадаўства ва ўгоддзях – адна з галоўных задач егерскай службы лесапаляўнічай гаспадаркі. За 2012 год намі сумесна з лясной аховай лясгаса, супрацоўнікамі РАУС, інспекцыяй аховы расліннага і жывёльнага свету пры Прэзідэнце Рэспублікі Беларусь праведзена 68 рэйдаў. У выніку іх за парушэнне Правілаў палявання да адміністрацыйнай адказнасці прыцягнута трое грамадзян, складзены адпаведныя пратаколы, кан-фіскаваны 2 незарэгістраваныя паляўнічыя стрэльбы.
У гэтыя зімовыя дні егеры абараняюць свае ўгоддзі і ад грозных драпежнікаў – ваўкоў, якія наносяць страты жывёле, паляўнічым сабакам і асабліва небяспечныя для людзей. Цяпер, па глыбокім снезе, розныя звяры, і ў першую чаргу капытныя, становяцца для іх лёгкай здабычай. Сёлета “шэрыя” рэгулярна актыўна заходзяць на тэрыторыю нашага раёна, нават зграямі па 5-7 асобін. Высачыць, упаляваць такога драпежніка з уні-кальным нюхам, слыхам, зрокам, памяццю, прыроднай кемлівасцю надзвычай няпроста, пад сілу хіба вопытным паляўнічым-ваўчатнікам. Вядома ж, што сярдзіты воўк у пастцы сам сабе нагу ад’есць, а ў рукі не дасца. Не так даўно такі важкі трафей здабыў у сваім абходзе № 8 (бліз вёскі Якімава Ляда) егер Анатоль Антонавіч Юркавец.
У егерскай службе лесапаляўнічай гаспадаркі працуюць таксама Сяргей Андрэевіч Ерамееў з Усох, Аляксандр Міхайлавіч Хітракоў з Запольскага лясніцтва, Валерый Мікалаевіч Лёпа (Максімавічы), Уладзімір Сямёнавіч Карнееў (Доўгае) і іншыя. Быць ашчаднымі гаспадарамі, абаронцамі і памочнікамі насельнікам лесу – наша задача. Галоўнае – не парушыць храм прыроды.
Аляксандр Куляўцоў,
інжынер па паляўнічай гаспадарцы ДЛГУ
“Клічаўскі лясгас”.