Год пад зоркай Максіма Багдановіча
Ёсць паэты, якія пішуць творы, каб потым з іх выдаць выбранае, але ёсць паэты, што пішуць толькі выбранае. Да такіх належыць Максім Багдановіч.
2011 год аб’яўлены годам Максіма Багдановіча. Ва ўстановах адукацыі раёна праходзілі шматлікія мерапрыемствы, прысвечаныя 120-й гадавіне з дня нараджэння вядомага паэта-класіка. У школьных бібліятэках дзейнічалі кніжныя выставы, былі аформлены насценныя газеты, праходзілі вусныя часопісы і круглыя сталы. Конкурсы малюнкаў да твораў паэта правялі ў Нясяцкай СШ, Дзмітраўскім ВПК, Усохскай БШ.
Завочныя падарожжы па мясцінах паэта запомняцца вучням Нясяцкай СШ, Каўбчанскага ВПК, літаратурныя тэматычныя вечарыны і гасцёўні прайшлі ва Усакінскай БШ, Ганчанскім ВПК, Запольскай і Максімавіцкай сярэдніх школах. Для вучняў Бацэвіцкага ВПК і СШ № 1 памятнымі сталі экскурсіі ў Літаратурны музей Максіма Багдановіча. Школьнікі не толькі дакрануліся да гістарычнай спадчыны паэта, але і ўбачылі сапраўдную батлейку.
У раённым конкурсе сачыненняў, прысвечаных юбілею Максіма Багдановіча, прынялі ўдзел вучні ўсіх школ раёна. Трэба адзначыць, што шмат было прадстаўлена цікавых творчых работ. Так, Вераніка Белазор з Дзмітраўскага ВПК напісала сачыненне ў форме дзённіка, старонкі якога пераносяць нас у Крым, дзе пахаваны паэт. Вучаніца СШ № 2 Дар’я Сукора знайшла цікавыя факты з жыцця песняра і падзялілася імі на старонкай творчай работы. Анастасія Лёпа з Максімавіцкай СШ апісала значэнне прыроды ў жыцці Максіма Багдановіча.
Актыўна ўдзельнічалі школьнікі і ў конкурсе чытальнікаў вершаў паэта-юбіляра. Пераможцамі ў малодшай групе сталі Вікторыя Харкова з СШ № 1 (дыплом І ступені), Валерыя Міхалап з Дзмітраўскага ВПК адзначана дыпломам ІІ ступені, дыплом ІІІ ступені атрымаў Сяргей Ісаеў з Усакінскай БШ.
У старшай групе перамагла Кацярына Кірэева з Доўгаўскага ВПК, другое месца заняла Таццяна Жуковіч з Востраўскай СШ, трэцяе прызавое месца прысуджана Івану Кудзіну і Людміле Кавалёвай з Пярэкальскай СШ. Узнагароды атрымалі ўсе ўдзельнікі гэтага конкурсу. Вучаніца СШ №2 Кацярына Цімаховіч удзельнічала ў ІІ этапе рэспубліканскай алімпіады па беларускай мове і літаратуры, дзе прачытала верш уласнага сачынення, які прысвечаны паэту.
Год пад зоркай Максіма Багдановіча не праходзіць дарэмна. З’яўляюцца новыя, маладыя таленты, якія – хто ведае? – з цягам часу заблішчаць на літаратурным небасхіле новымі зоркамі.
Валянціна НІКІЦІНА,
метадыст раённага
вучэбна-метадычнага кабінета.