21-23 чэрвеня ў Пружанах праводзілася рэспубліканская спартакіяда “Каласок” па валейболе сярод дзяўчат і юнакоў 1995-1997 гадоў нараджэння. Магілёўскую вобласць на гэтых спаборніцтвах прадстаўлялі пераможцы абласной спартакіяды – каманды дзяўчат Кіраўскага і юнакоў Клічаўскага раёнаў.
Вялікага поспеху на гэтых спаборніцтвах дабілася каманда юнакоў, у складзе якой выступалі вучні Максімавіцкай і Пярэкальскай школ: Аляксандр Пінчук , Арцём Крыўцоў , Андрэй Каляда, Арсеній Сілін, Мікіта Кальчэўскі, Аляксандр Кошаль, Алег Астрэйка, Сяргей Скудны. Нашы валейбалісты занялі ганаровае ІІ месца.
Дзяўчаты з Кіраўскага раёна ў выніковай табліцы – на чацвёртым месцы. Поспех каманды юнакоў не з’яўляецца выпадковым. Гэта вынік настойлівых трэніровак, майстэрства і волі юных спартсменаў.
А пачыналіся спаборніцтвы для нашых рабят складана. Ужо ў першай гульні, пасля шасцігадзіннай дарогі (выязджалі ў 5 гадзін раніцы), давялося сустрэцца з камандай Гродзенскай вобласці – пераможцай мінулагодняй спартакіяды. Напружаная, відовішчная гульня завяршылася на карысць гродзенцаў з лікам 2:0. У другой гульні нашымі сапернікамі была камандаМінскай вобласці. Зладжаная гульня ў атацы, надзейны блок забяспечылі нам упэўненую перамогу з лікам 2:0.
У наступны дзень наша каманда перамагла валейбалістаў Брэсцкай вобласці (2:1) і Віцебскай (2:0). У заключны дзень з такім жа лікам была атрымана перамога над гамельчанамі.
У выніку наша каманда заняла другое месца, прапусціўшы наперад гродзенцаў, на трэцім –
валейбалісты Мінскай вобласці.
Ва ўрачыстай абстаноўцы намеснік міністра спорту і турызму Анатоль Аляксеевіч Барышаў уручыў рабятам медалі і дыпломы.
Патрэбна адзначыць вялікі ўзровень арганізацыі спаборніцтваў. Спартсменам была прапанавана вялікая культурная праграма. Яны наведалі агракамбінат “Журавінка”, аквапарк, Лядовы палац.
З добрым настроем і жаданнем далей удасканальваць сваё майстэрства вярталіся юныя валейбалісты дадому.

Яўген КАРОТКІ,  трэнер каманды

*снимок – из галереи Google