18 мая работнікі музеяў будуць адзначаць сваё прафесійнае свята
Заўтра, 18 мая, работнікі музеяў на ўсёй планеце будуць адзначаць сваё прафесійнае свята. А ўстаноўлена яно ў 1977 годзе на пасяджэнні Міжнароднага савета музеяў. Гэта свята не толькі музейных работнікаў, але і гісторыкаў, усіх тых, хто ўмее цаніць памяць аб мінулым.
Музеі – гэта наша гісторыя, гэта тое месца, дзе захоўваюцца самыя каштоўныя рэчы, якія некалі вынайдзены і створаны чалавекам.
У Беларусі музейная справа зарадзілася пасля далучэння яе тэрыторыі да Расійскай імперыі. Паводле царскага ўказа Пятра І 1718 года, за знайдзеныя “камяні, косці, зброю, што вельмі старое і незвычайнае”, назначаліся ўзнагароды.
У сярэдзіне 19 стагоддзя скарбы і калекцыі рарытэтаў сталі збіраць Радзівілы, браты Тышкевічы, Сапегі, Тыгенгауз і іншыя вядомыя роды беларускіх магнатаў. Яны прадстаўлялі сабой скарбніцы гісторыі і культуры Беларусі і іншых народаў свету.
Сёння ў Беларусі 147 музеяў: мастацкіх і літаратурных, тэхнічных і прыродазнаўча-навуковых, гістарычных і мемарыяльных, краязнаўчых.
Існуюць і незвычайныя музеі. У Германіі ёсць музей рухавікоў, у Прыбалтыцы – чарцей, у Расіі – бабы Ягі, у Японіі – ветру. Але якім бы ні быў музей, галоўнае, каб яго госці, паслухаўшы экскурсію, выйшлі з яго і адчулі сябе некалькі больш мудрымі, добрымі, міласэрнымі.
Нашаму раённаму музею крыху больш за 40 гадоў. У 1964 годзе ў самым сэрцы Клічаўскай партызанскай зоны – пасёлку Цераболь– па ініцыятыве ветэранаў партызанскага руху быў адкрыты музей партызанскай Славы.
30 студзеня 1967 года распараджэннем № 61 Савета Міністраў БССР было прынята рашэнне аб стварэнні ў г. п. Клічаве музея народнай Славы. Заснаваны ён быў 5 чэрвеня 1967 года. З Цераболі быў перавезены яго драўляны будынак. Экспазіцыя ўрачыста адкрыта 10 жніўня 1969 года.
Першым дырэктарам музея быў Міхаіл Савельевіч Канапліцкі. З 1985 па 2005 годы ўстановай кіравала Лідзія Лук’янаўна Ачыновіч. Апошнія шэсць гадоў калектыў музея ўзначальвае Наталля Уладзіміраўна Храмянкова.
У 1992 годзе раённым выканаўчым камітэтам было прынята адпаведнае рашэнне аб расшырэнні экспазіцыйных плошчаў і перапрафіліраванні музея народнай Славы ў краязнаўчы музей. Будаўнічыя і рамонтныя работы завершаны ў 2005 годзе. У красавіку 2006 года музей набыў статус юрыдычнай асобы і зарэгістраваны як установа культуры “Клічаўскі краязнаўчы музей”.
Сёння гісторыя Клічаўшчыны адлюстравана ў экспазіцыях залаў музея: уводным (інфармуе аб музеі і рэгіёне, геаграфічным становішчы, мясцовых легендах, сімволіцы); археалогіі, “Чалавек і рака”, “Культура і быт земляробаў”, “Гісторыя Клічаўскай партызанскай зоны”, зімовы сад і іншых. Дзейнічае выставачная зала, дзе размяшчаюцца пачаргова часовыя выставы.
Пры музеі функцыянуе мемарыяльны комплекс партызанскай славы “Усакіна”. Асаблівасцю музея з’яўляецца наяўнасць аптэкарскага агароду.
Людміла РУСЕЦКАЯ,
навуковы супрацоўнік
раённага краязнаўчага музея.