Самазабойства – адчаяны крок ці непазбежнасць?
Што штурхае людзей да суіцыду? Якія абставіны загналі чалавека ў пятлю? Пытанні, на якія няма адказу. На гэты раз самагубства здзейсніў 67-гадовы вясковы жыхар.
У парасуіцыдальных дзеяннях заўважаны і жыхар аграгарадка Бацэвічы, які з рэзанымі ранамі быў дастаўлены ў раённую бальніцу.
Міліцыя высвятляе
У жыхара Клічаўскіх Пасёлкаў знойдзены пакецік марыхуаны вагой больш за 6 грамаў.
Вядзецца следства.
Стажыруюцца на крадзяжах
Двое раней судзімых маладых хлопцаў вырашылі разжыцца на чужым, а таму ў в. Загацце залезлі ў хату і прыхапілі халадзільнік. 11 сакавіка па гэтым факце ўзбуджана крымінальная справа.
А вось у Заполлі ноччу з зачыненага хлева ўкралі цельную карову. Хто гэта зрабіў, высвятляе міліцыя.
Нешта з розумам яго стала…
Ну забыў жыхар пас. Ганчанскі, куды паклаў свае грошы, падумаў – укралі і хутка вызваў міліцыянераў. Грошы (120 000 руб.) знайшлі ў хаце гаспадара.
Даверыў, ды дрэнна праверыў
Жыхар раёна з палёгкай перадаў свайму знаёмаму для набыцця аўтамабіля 12 000 000 беларускіх рублеў. Прайшло 2 тыдні – ні грошай, ні аўтамабіля, знік і знаёмы. Вядзецца праверка.
Справы па п’янцы
Невядома, за што так моцна збіў жыхар в. Пярэкаль сваю жонку, якая была дастаўлена ў бальніцу, ды яшчэ ў п’яным стане.
У той жа дзень пасля п’янкі ў аграгарадку Арэхаўка грамадзянін Т., жыхар в. Пярэкаль, заснуў так, што не чуў, як з кармана знік пашпарт і грошы.
20 літраў брагі знайшлі ў пенсіянеркі М. з аграгарадка Бацэвічы.
Па ўсіх фактах вядуцца праверкі.
Няма ў мяне – не будзе і ў цябе, так вырашыў жыхар в. Асавы, які 13 сакавіка, як сцямнела, падпаліў аўтамабіль свайго суседа. Агнём знішчана машына і часткова хлеў, дзе яна знаходзілася. Узбуджана крымінальная справа.
А. В. ДОБРЫГИН, начальник штаба РОВД.