У гаспадарках ужо пачалі сеяць кукурузу і сілас
У гэтым годзе аграрыі нашай вобласці паставілі перад сабой задачу: сабраць не менш чым
1 млн 350 тон зерневых і зернебабовых. Выкананне гэтых планаў у многім залежыць ад паспяховасці пасяўной кампаніі, якая ў гэтыя красавіцкія дні ў самым разгары.
– Да пачатку пасяўной усе механізатары атрымалі спецадзенне, прайшлі інструктаж па тэхніцы бяспекі, у час палявых работ забяспечваюцца за кошт сродкаў гаспадарак гарачым харчаваннем, – адзначыў Грашылаў Сяргей Паўлавіч, старшыня райкама прафсаюза работнікаў АПК. – Распрацаваны ўмовы раённага спаборніцтва сярод механізатараў, у кожнай гаспадарцы вядзецца экран спаборніцтваў, дзе кожны мае магчымасць пазнаёміцца з вынікам працы за дзень.
Адны з першых у вобласці аграрыі нашага раёна справіліся з сяўбой ранніх яравых зерневых і зернебабовых
культур, а ў гэтыя сонечныя, цёплыя дні ў гаспадарках ужо пачалі сеяць кукурузу на сілас.
Сярод механізатараў на вясенне-палявых работах згодна з умовамі раённых спаборніцтваў вызначыліся лідары, якія адзначаны падзячнымі пісьмамі і грашовымі прэміямі райкама прафсаюза работнікаў АПК.
Са словамі шчырай удзячнасці за самаадданую працу іх уручыў на мінулым тыдні Грашылаў С. П., які пабываў з гэтай прыемнай місіяй на палях гаспадарак раёна.
Сярод узнагароджаных – механізатары УКСП “Саўгас “Дабраволец” Іван Мікалаевіч Жук і Іван Іванавіч
Салановіч, Раман Мікалаевіч Астапенка з СВК “Калгас “Нясята”, Віктар Уладзіміравіч Вараненка з УКСП
“Саўгас “Вольса” і Генадзь Рыгоравіч Кукушкін, механізатар КСВК “Калгас імя Леніна”.
Алена ГАНЧАРОВА.