Удзельнічай у акцыі «Тыдзень лесу»

Лес – наша галоўнае прыроднае багацце. Ляснымі масівамі занята амаль 40% тэрыторыі Беларусі. Наша рэспубліка ўваходзіць у лік вядучых лясных дзяржаў Еўропы. Для таго каб захаваць для нашчадкаў веліч і прыгажосць нашых лясоў, трэба выхаваць у сабе беражлівыя адносіны да лесу.
Чысціня і парадак у лясах залежаць ад нашай культуры. Традыцыйна па ініцыятыве Міністэрства лясной гаспадаркі у рэспубліцы праводзіцца добраахвотная акцыя «Тыдзень лесу». Сёлета гэтамерапрыемства прысвечана Міжнароднаму году лясоў.
Удзельнічаць у гэтай акцыі змогуць усе жадаючыя. У час мерапрыемства ёсць магчымасць пазнаёміцца з лесагаспадарчай дзейнасцю, даведацца, як вырошчваецца лес, а таксама ўласнаручна ўнесці ўклад у аднаўленне лясоў. У лясгасе вызначаны аб’екты, дзе ўдзельнікі акцыі змогуць пасадзіць дрэвы, добраўпарадкаваць тэрыторыю, прыбраць лес ад смецця і хламу. Гэтыя ўчасткі размешчаны на тэрыторыі Патоцкага, Усакінскага, Доўгаўскага і Віркаўскага лясніцтваў. Як паказвае практыка, такая акцыя прыносіць свой плён.
Так, у мінулым годзе ў часакцыі «Тыдзень лесу» добраахвотныя памочнікі пасадзілі саджанцы на 50 гектарах, адрамантавалі 8 месцаў адпачынку, 9 гектараў (19 участкаў) лесу прыбралі ад смецця і хламу, добраўпарадкавалі 7 участкаў, агульная плошча якіх – 10,5 гектара. Жадаючыя прыняць удзел у гэтай акцыі могуць звярнуцца ў лясніцтвы ДЛГУ «Клічаўскі лясгас» або званіць па тэлефоне 52-615.

Святлана ЧЫРЭЙЧЫК,
намеснік дырэктара
па ідэалагічнай рабоце
ДЛГУ «Клічаўскі лясгас».

Добавить комментарий