Удзельнікаў конкурсу падтрымлівалі супрацоўнікі аддзялення, журы
Са жніўня мінулага года ў нашым раёне ў установе «Клічаўскі раённы цэнтр сацыяльнага абслугоўвання насельніцтва» пачало дзейнічаць аддзяленне дзённага знаходжання для інвалідаў. Зараз яго наведваюць 15 чалавек з абмежаванымі магчымасцямі. Задача супрацоўнікаў аддзялення – дапамагчы адаптавацца ім да жыцця, прывіць культурныя, гігіенічныя, працоўныя навыкі і інш.
За гэты час юнакі і дзяўчаты змаглі сябе праявіць. Кожны з іх па-свойму цікавы і непаўторны чалавек, а разам – і супрацоўнікі, і падапечныя – дружны і згуртаваны калектыў, дзе пануе згода, узаемаразуменне, дабрыня і шчырасць. У чарговы раз давялося пераканацца ў гэтым у час конкурсу «Рыцарскі турнір». Для ўдзелу ў гэтым мерапрыемстве запрасілі супрацоўнікаў цэнтра сацыяльнага абслугоўвання насельніцтва і вучэбна-курсавога камбіната, якія выступілі ў ролі сапернікаў каманды юнакоў аддзялення дзённага знаходжання для інвалідаў. Удзельнікам абедзвюх каманд было нялёгка. Годна спраўляліся з усімі выпрабаваннямі і адны, і другія: паказвалі свае мастацкія здольнасці, спаборнічалі ў трапнасці, майстэрстве. Удзельнікаў конкурсу падтрымлівалі супрацоўнікі аддзялення, журы, а дзяўчаты падрыхтавалі музычныя нумары. Завяршыўся «Рыцарскі турнір» з лікам 21:21. Яшчэ ўсіх чакала вясёлая віктарына, розыгрыш суперпрыза, уладальнікам якога па рэзультатах віктарыны стаў Міхаіл Іванавіч Матузаў. Астатнія ўдзельнікі конкурсу сталі пераможцамі ў розных намінацыях, а галоўнае – усе атрымалі зарад бадзёрасці і добрага настрою.
Алена ГАНЧАРОВА.