Старшыня гаспадаркі не спяшаецца прыняць меры
Відаць, начытаўшыся казак Бажова, уявіла сябе гаспадаром ледзяной гары кіраўніцтва КВК «Калгас імя Будзёнага». Але ж казачная гаспадыня Меднай гары зорка берагла свае скарбы, а «будзёнаўцы» празрыстае золата Беларусі – ваду – знішчаюць.
Зірніце на фотаздымак: гэта воданапорная вежа гаспадаркі на МТФ Малая Вольса. Ужо некалькі гадоў не працуе яе аўтаматыка, якая забяспечвае неабходны ўзровень вады і рацыянальнае яе выкарыстанне. З-за няспраўнасці ўключаецца і выключаецца вежа механічна. Старшыня праўлення толькі рукамі разводзіць: ну няма грошай у гаспадарцы, каб ухіліць непаладкі! Што ж, гэта зразумела. Але ж і мер ён упарта не жадае прымаць, каб наладзіць неабходны рэжым работы помпаў вежы, кантроль за яе работай. Вось вада і цячэ суткамі, у мароз замярзае, таму і ўтварыўся «помнік безгаспадарчасці», які добра відаць і з аўтадарогі Чашнікі – Бобр – Бабруйск кожнаму, хто тут праязджае. Наледзь ужо шматтонная, хутка і саму вежу аберне, тады жывёла застанецца без пітной вады.
А старшыня гаспадаркі не спяшаецца прыняць хоць якія-небудзь меры, каб выправіць становішча. І гэта нягледзячы на тое, што райінспекцыя прыродных рэсурсаў і аховы навакольнага асяроддзя даўно б’е трывогу – накіроўвала неаднаразова папярэджанні аб неабходнасці выпраўлення сітуацыі. Між тым і насельніцтва скардзіцца, што вада з вежы выцякае на вуліцу Малой Вольсы і размывае яе.
Яшчэ большым «змагаром» за прыроду выступае УКСП «Саўгас «Вольса». Гной ад клічаўскай свінафермы вывозяць не куды-небудзь, а прама да самага меліярацыйнага канала, які ўпадае ў Вольсу, а яна тут жа, мо метрах у двухстах. Хутка пацяплее, і жыжа пойдзе ў ваду. Патрэбна тэрмінова прыняць меры, каб недапусціць бяды. Здзіўляемся: чаму рыба дохне ў рэчцы, чаму няма як у ёй купацца ўлетку, вада брудная, мутная? Ды хіба ж не нам і нашым дзецям тут жыць? Чаму так гаспадарым?
Уладзімір КНІГА,
начальнік раённай інспекцыі
прыродных рэсурсаў
і аховы навакольнага асяроддзя;
Ніна ІЗОХ,
супрацоўніца «Сцяга Саветаў».