Атэла… на мясцовы манер
Многія казкі пачынаюцца са слоў «Жылі-былі…» Аб тым, як жылі паміж сабой Юрый Ракаў і Алена Міхайлевіч са станцыі Нясята, цяпер меркаваць цяжка. Прынамсі, у поле зроку праваахоўных органаў раней не траплялі.
Але вынікам іх сужыцельства сталі не толькі сумесныя дзеці, але і трагедыя, якая адбылася ў адзін з мінулагодніх вераснёўскіх дзён. Аднойчы Алена з суседам на машыне сужыцеля паехалі па журавіны ды заблудзіліся там. Толькі праз паўтара сутак змаглі дадому вярнуцца. А Юрый, па ўсім відаць, гараваў не ад таго, што родны чалавек мо ў багне згінуў, а расціў-раскручваў у сабе адно пачварнае пачуццё – рэўнасць. Да таго ж, яшчэ добра «падагрэў» сваё гора спіртным. І таму, як толькі ўбачыў сваю сужыцельку, пачаў збіваць яе прама на дарозе. І дома біў люта, здзекаваўся, пагражаў забойствам, катаваў мо гадзіны паўтары – ніяк не мог здаволіцца. Варварства, ды і толькі. У выніку жанчына трапіла на бальнічны ложак з пераломам і мноствам цялесных пашкоджанняў.
І хоць пасля прасіў Юрый у Алены прабачэння і яна прэтэнзій да яго не мела, у адпаведнасці з заканадаўствам па гэтай крымінальнай справе ў адносінах Юрыя Ракава было праведзена следства. Суд вынес справядлівае рашэнне: бліжэйшыя 1 год і 5 месяцаў Ю. А. Ракаў за ўчыненае злачынства правядзе ў папраўчай калоніі агульнага рэжыму.
Аналагічных выпадкаў ў жыцці нямала. І ў кожным з іх ці не галоўны фактар бяды – алкаголь. Агульна вядома, што спіртное яшчэ нікога не зрабіла разумным, разважлівым, абачлівым. Злоўжыванне ім – гэта трагедыі людзей, паламаныя іх лёсы.
За 2010 год на бытавой глебе ў раёне ўчынена 16 злачынстваў, з іх 1 – забойства, 2 – прычыненне цяжкіх цялесных пашкоджанняў, 4 – пагрозы забойствам, 7 – прычыненне лёгкіх цялесных пашкоджанняў, што пацягнулі кароткатэрміновае расстройства здароўя. Удакладню, што з гэтага агульнага ліку злачынстваў 11 учынена ў стане алкагольнага ап’янення.
Алег МІКУЛОВІЧ,
следчы следчага
аддзялення папярэдняга
расследавання РАУС
капітан міліцыі.