Патрыятызм – гэта любоў да сваёй малой радзімы. І каб гэта пачуццё было з чалавекам на працягу  ўсяго жыцця, трэба з маленства расказваць дзецям аб гісторыі сваёй шматпакутнай зямлі, яе яскравых падзеях і таленавітых людзях.
Кожны з работнікаў ДУА “Доўгаўскі ВПК дзіцячы сад – сярэдняя школа” імкнецца да таго, каб падрастаючае пакаленне ведала сваю гісторыю і ганарылася ёю. Дзеля гэтага мы праводзім шматлікія мерапрыемствы, конкурсы і віктарыны са школьнікамі і выхаванцамі дзіцячага сада. Але больш за ўсё дзецям падабаюцца турыстычныя паходы па памятных мясцінах Клічаўшчыны, якія сталі ў нашай школе традыцыйнымі. Яны дазваляюць школьнікам праверыць сябе і бліжэй пазнаёміцца з краем, а таксама даюць магчымасць праявіць навыкі на абласных турслётах, адзін з якіх з удзелам нашых рабят адбыўся ў маі 2016 года.
А новы навучальны год пачаўся для старшакласнікаў, выхаванцаў аб’яднання па інтарэсах “Турызм і спартыўнае  арыентаванне”, водным паходам на байдарках. У рамках рэспубліканскай акцыі “Зорны паход” мы разам з Ігарам Мікалаевічам Журбо, настаўнікам фізпадрыхтоўкі, і навучэнцамі школы праплылі па жывапісных мясцінах ракі Друць маршрутам “Вёска Ядраная Слабада – вёска Брылёўка”.
Галоўнай мэтай воднага паходу было не толькі развіццё ў выхаванцаў навыкаў кіравання байдаркамі, арыентавання на незнаёмай мясцовасці, але і наведванне мясцін, звязаных з падзеямі Вялікай Айчыннай вайны. Наш паход пачаўся з наведвання памятнага знака ахвярам – спаленым жыхарам вёскі Доўгае ў той бязлітасны час. Таксама мы наведалі магілу невядомага салдата, пахаванага паміж вёскамі Ядраная Слабада і Слабодка. Вучні даведаліся аб падрабязнасцях ваенных па-дзей у гэтых мясцінах, прыкладах мужнасці і стойкасці нашых людзей у гады вайны.
Мы разам з вучнямі ставім перад сабой вялікую мэту – скласці малы гістарычны зборнік памятных мясцін Доўгаўскага сельсавета, у які ўвойдуць шматлікія месцы рознага часу. А ў гэтым нам дапамогуць пешыя і водныя турпаходы.

Васіль АЛЬШЭЎСКІ,
настаўнік гісторыі і грамадазнаўства ДУА
“Доўгаўскі ВПК дзіцячы сад – сярэдняя школа”.
Фота з архіва школы.