СЕЗОН НАРЫХТОВАК НАСТУПІЎ
Адна з найбольш важных функцый спажывецкай кааперацыі – нарыхтоўчая дзейнасць. З пачаткам лета яна ўступае ў актыўную фазу. На палетках і сядзібах расце, наліваецца сокамі ранняя гародніна, у садах і лясах пачынаюць спець ягады… Спажывец хоча паласавацца дарамі прыроды, а чалавек, які вырасціў багаты ўраджай, – здаць яго лішкі з карысцю для сябе. Жаданні абодвух бакоў акурат па сіле задаволіць нарыхтоўшчыкам сістэмы спажывецкай кааперацыі.
Вось што расказаў аб арганізацыі закупак у насельніцтва лішкаў сельскагаспадарчай і дзікарослай прадукцыі намеснік старшыні праўлення раённага спажывецкага таварыства па нарыхтоўках Васіль Казіміравіч РАБЦЭВІЧ:
–Сёлета мы плануем арганізаваць работу каля дзясятка няштатных нарыхтоўшчыкаў. Яны будуць ездзіць па раёне, прымаць садавіну і гародніну, дзікарослую прадукцыю. Нарыхтоўчыя пункты, якія размешчаны ва ўсіх магазінах спажывецкай кааперацыі, і прыёмны нарыхтоўчы пункт на ст. Несята працуюць згодна з распарадкам работы. Што датычыць іншых відаў прадукцыі, то, напрыклад, мы павялічылі цэны на закуп у насельніцтва мяса: за кілаграм у забойнай вазе плацім да 40 тыс. рублёў у залежнасці ад катэгорыі. У прыватнікаў, дарэчы, цана ніжэйшая. Канешне, аб’ёмы закупу мяса цяпер значна меншыя. Некалі ў месяц яны складалі 1,5 тоны, а цяпер кілаграмаў 800. Мы выязджаем і дамаўляемся са здатчыкамі пра ўмовы закупу – у забойнай ці жывой вазе. Разлічваемся з людзьмі своечасова. Інфармуем насельніцтва пра нарыхтоўчую дзейнасць, рэгулярна даём у газету аб’явы з тэлефонамі, па якіх можна звярнуцца па любым пытанні. Пры выкананні заявак ад здатчыкаў прыярытэт аддаём аддаленым населеным пунктам і пенсіянерам.
– Нарыхтаваць прадукцыю – адна справа. Ці ёсць належныя ўмовы для захоўвання?
– Тыя ж ягады, яблыкі захоўваем не больш чым два дні. Прадукцыя знаходзіцца ў камерах, абсталяваных спліт-сістэмамі, што дазваляе падтрымліваць камфортны мікраклімат, а потым адпраўляем іх у Глуск у цэх глыбокай замарозкі, з якім маем дамоўленасці на перапрацоўку і захаванне прадукцыі.
– Якія захады робіце, каб забяспечыць пакупніка свежай гароднінай?
– Цяпер закупляем у насельніцтва агуркі, крыху пазней дабавяцца памідоры. Да прыкладу, летась у чэрвені нарыхтавалі 58 тон гародніны, з іх практычна 70 працэнтаў – у Століне і Лунінцы. Туды ездзім па свежую прадукцыю і сёлета. Цана залежыць ад попыту і прапановы, за дзень на тыя ж агуркі можа памяняцца чатыры разы. Таму ад нашых нарыхтоўшчыкаў патрабуецца своеасаблівая гібкасць: даводзіцца стаяць і чакаць, каб прывезці па прымальнай для пакупніка цане і самім не прагадаць.
– Як кантралюеце якасць закупленай прадукцыі?
– Людзі, якія гадамі займаюцца гароднінным бізнесам, самі клапоцяцца пра якасць вырашчанага і пацвярджаюць яе даведкамі.
– У магазінах спажыўкааперацыі чамусьці няма ў продажы чырвоных буракоў новага ўраджаю…
– Насельніцтва для продажу чырвоныя буракі яшчэ не прапануе. Таму заключаем дагавор з фермерскай гаспадаркай. Праз тыдзень-другі атрымаем адсюль і буракі, і раннюю бульбу, і зяленіва, але яно ў нас вялікім попытам не карыстаецца.
– Калі бабуля з вёскі захоча здаць пару качанчыкаў ранняй капусты, прымеце?
– Прымем.
– І які дакумент запатрабуеце?
– Ніякіх дакументаў не трэба, нават усе неабходныя лабараторныя даследаванні бяром часткова на сябе.
– Наколькі ведаю, Белкаапсаюз ставіць перад кааператарамі задачу актыўна супрацоўнічаць менавіта з фермерскімі гаспадаркамі, каб круглы год задавальняць патрэбы гандлю ў сельгаспрадукцыі.
– У гэтым накірунку мы працуем даўно. Цесныя кантакты маем з фермерскай гаспадаркай “Іосіфавіч”. У яго адна з самых вялікіх гаспадарак па вырошчванні гародніны. Прадукцыя вырошчваецца згодна з тэхналогіяй, добра захоўваецца. Пры закладцы бульбы і капусты ў стабілізацыйны фонд падключаюцца прадпрымальнікі з нашага раёна. У сезон нарыхтовак у асноўным бяром ад насельніцтва бульбу. Астатняе – у малых аб’ёмах, для продажу ў магазінах.
– Дзе захоўваецца прадукцыя ў чаканні спажыўца?
– Маем адно невялікае сховішча. Хапае месца і для закладкі прадукцыі ў стабілізацыйны фонд, і для той, што ідзе на рэалізацыю за межы краіны. На экспарт звычайна адпраўляем бульбу.
– Напэўна, ёсць планы па кожным з відаў гародніны?
– Так. Бульбы плануем нарыхтаваць 150 тон, цыбулі –15, яблыкаў – 30, буракоў –10, морквы –10 тон, капусты – 30 тон.
– Усё гэта для рэалізацыі зімой?
– Штогод па ўзгадненні з райвыканкамам у кастрычніку закладваем стабілізацыйны фонд – бульбу, чырвоныя буракі, моркву, цыбулю, капусту. Пяць пазіцый па гародніне плюс яблыкі. Насамрэч нарыхтоўваем у разы больш, чым даведзена планам. З такім разлікам, каб хапіла на рэалізацыю да мая ўключна. Асноўны партнёр па яблыках – замежнае прадпрыемства “Арніка ў Магілёве”, з ім заключаем дагавор на пакупку і захоўванне неабходнай колькасці тон пладоў. У гэтай гаспадарцы вельмі добрае сховішча. Па меры неабходнасці пастаўляем фрукты ў гандлёвыя аб’екты. Будзем старацца і сёлетні нарыхтоўчы сезон арганізаваць так, каб здатчыкі засталіся задаволены.
– Дзякуй, Васіль Казіміравіч, і поспехаў вам у выкананні намечаных планаў.
Аліна СУДНІК.