“КЛАДЕЗЬ” зноў у Клічаве

размещено в: Наши новости | 0

Фестываль  праваслаўнай  культуры  “Кладезь”  па  добрай  традыцыі  і  па  блаславенні  епіскапа  Бабруйскага  і  Быхаўскага  Серафіма  зноў  завітаў  у  Клічаў.  Праграма   насычана  разнастайнымі  мерапрыемствамі,  накіраванымі  на  прапаганду  праваслаўнай  культуры,  хрысціянскіх  традыцый,  духоўнае  і  маральнае  развіццё  асобы.
Фестываль  у  нашым  горадзе  праходзіць  напярэдадні  Вялікага  посту,  на  масленічным  тыдні,  або  Сырапустнай  сядміцы.  У  вернікаў  ёсць  магчымасць  кожны  дзень  маліцца  аб  здароўі  ў  каўчэга  Марыі  Магдалены,  абразоў  першавярхоўных  апосталаў  Пятра  і  Паўла,   святога  Панцелеймана,  прэпадобнага  Елісея  Лаўрышэўскага,  прасіць  іх  аб    хадайніцтве  перад  Усявышнім  у  ачышчэнні  і  збаўленні  ад  грахоў  і  іншых  жыццёвых  калізій,  вымаліць  Божага  блаславення  на  далейшае  жыццё.
Пачаўся фестываль  Хрэсным  ходам  вернікаў  і  цырымоніяй  афіцыйнага  адкрыцця,  удзел    у  якім  прынялі  прадстаўнікі  мясцовай  улады.
Праўду  аб  алкагольнай  залежнасці  ў  праекце  “Агульная  справа”,  які   ажыццяўляе  айцец  Дзіанісій,  кіраўнік  каардынацыйнага  цэнтра  па  супрацьдзеянні  наркатычнай  і  алкагольнай  залежнасці  Беларускай  праваслаўнай  царквы,  даведаліся  вучні  мясцовых  школ,  студэнты  аграрна-тэхнічнага  каледжа,  людзі,  якія  пакутуюць  гэтым  захворваннем  і  знаходзяцца  ў  групе  рызыкі.
Цёплыя  ўспаміны  засталіся  ў  нашых  сэрцах  ад  сустрэчы  з  Таццянай  Дашкевіч,  пісьменніцай,  выканаўцай  уласных  песень,  аўтарам  шматлікіх  добраілюстраваных  кніг  для  дзяцей.  Разам  з  іншымі  аматарамі  паэзіі  і  аўтарскай  песні  наталялі  душу  Ф. В. Вашчыла,  старшыня  раённага  выканаўчага  камітэта,  і  протаіерэй  Сергій,  настаяцель  Свята-Дабравешчанскага  храма.
У  дні  фестывалю  ў  праекце  “Добрае  кіно”  гледачы  мелі  магчымасць  паглядзець  цікавыя  і  змястоўныя  мастацкія  і  дакументальныя  кінастужкі:  “Дырыжор”,  “На  мосце”,  “Рыжык  у  Зазяркаллі”,  “Прытчы” ,  “Інакіня”.
У    дзіцячай  школе  мастацтваў  творчая  інтэлігенцыя  раёна  прыняла  ўдзел  у  праекце  “Талент  і  сэнс  жыцця”. Школьнікі  і  ўсе  жадаючыя  не  пашкадавалі,  што  прысутнічалі  на  мерапрыемстве  “Гісторыя  славянскай  пісьменнасці”,  прысвечаным  Дню  праваслаўнай  кнігі.
Гутаркі і  мультымедыйныя  прэзентацыі  “Моладзь  і  праваслаўе”  (СШ  № 1),  праект  “Пераадоленне”  ў  раённым  Цэнтры  сацыяльнага  абслугоўвання,  духоўна-маральныя  аспекты  медыцынскай  этыкі  ў  праекце  “Медыцына  і  праваслаўе”  пакінулі  незабыўныя  ўражанні  ў  душах  усіх,  хто  ў  іх  удзельнічаў.  А  яшчэ  ў  іх  застануцца  цёплыя  ўспаміны  ад  сустрэчы  з  вельмі  адукаванай  і  шматгранна  таленавітай  матушкай  Марыяй.
Усе,  хто  прыйшоў  у  раённы  музей  на  сустрэчу  з  Наталляй  Іванаўнай  Шчарбаковай,  кандыдатам  навук культуралогіі,  атрымалі  шмат  цікавых  і  карысных  звестак  аб  праваслаўных  святынях  Беларусі,  па-знаёміліся  з  праваслаўным  календаром  і   даведаліся  аб  новамуча-ніках.
Не  засталіся  па-за  ўвагай  старыя  і  нямоглыя,  хворыя  людзі,  якія  пражываюць  у  Доме  ветэранаў  і  ў  Бацэвіцкай  бальніцы  сястрынскага  догляду.
Ва  ўсе  дні  фестывалю-кірмашу  працаваў  дзіцячы  лялечны  тэатр  “Батлейка”,  майстар-клас  па  пляценні  з  саломкі,  выстава  мастацкай  і  духоўна-асветніцкай  літаратуры.
Клічаўляне  палюбілі  фестываль  праваслаўнай  культуры  “Кладезь”, ахвотна  наведваюць  мера-прыемствы,  набываюць    святыя  абразы,  манастырскі  мёд  і  хлеб,  лекавыя  травы  і  гарбату,  крэмы,  мазі  і  іншыя  неабходныя  рэчы,  якія  створаны  па  блаславенні,  з  малітвай  і  любоўю  ўмелымі  рукамі  манахінь  і  насельнікаў  Свята-Елісавецінскага  манастыра  г. Мінска.
У  суботу  і  нядзелю  выстава- кірмаш  у  нашым  горадзе  яшчэ  будзе  працаваць.  Таму   ёсць  магчымасць  наведацца  ў  Дом  культуры  і  набыць  патрэбныя  духоўныя  і  матэрыяльныя  каштоўнасці,  паслухаць  чароўную  музыку,  падаць  запіскі  і  проста  ўсёй  сям’ёй  карысна  правесці  выхадныя  дні  і  папрысутнічаць  на  цырымоніі  закрыцця  фестывалю.

Аліна  СУДНІК.

Оставить ответ

:wink: :twisted: :roll: :oops: :mrgreen: :lol: :idea: :evil: :cry: :arrow: :?: :-| :-x :-o :-P :-D :-? :) :( :!: 8-O 8)