У пошуках гармоніі розуму і веры

размещено в: Наши новости | 0

На мінулым тыдні ў райцэнтры ўжо ў другі раз прайшла праваслаўна асветніцкая выстава-кірмаш «Кладзезь».

Наша сучаснае грамадства ўсё часцей пачынае ўспрымаць рэлігійныя маральныя прынцыпы як прыцягальныя і выратавальныя арыеціры духоўнага адраджэння. Адыходзяць у мінулае памылковыя адносіны да рэлігіі як да неадукаванасці і невуцтва. Напэўна, цяжка аспрэчыць той факт, што праваслаўная культура акумулюе радасці, пакуты, спадзяванні не аднаго пакалення, таму заканамерна тое, што ў нашым сучасным жыцці аднаўляюцца рэлігійныя ідэі.

Праваслаўная вера нясе нам гармонію розуму і сэрца. Пераканацца ў гэтым і адчуць на сабе жыватворны ўплыў мы мелі магчымасць у час адкрыцця выставы-кірмашу і праекта «Музыка – выхаванне душы».

Пачаліся мерапрыемствы з хрэснага ходу, які ўзначаліў пратаіерэй Сергій, настаяцель Свята-Благавешчанскага храма. Затым ён адслужыў малебен на пачатак добрай справы. Да прысутных звярнуліся інакіня Любоў, насельніца Свята-Елісавецінскага жаночага манастыра, Алена Ярошка, начальнік аддзела ідэалагічнай работы райвыканкама.

Праграма духоўна-асветніцкіх мерапрыемстваў фестывалю «Кладзезь» была вельмі змястоўная і цікавая. Жыхары раёна мелі магчымасць паўдзельнічаць у праектах «Не пакіну вас сіротамі», «Агульнаясправа. Праўда аб алкагольнай залежнасці», «Сцяжынкі да святыняў роднага краю», «Ты не адзін», «Навошта чалавеку старасць», «Бацькі і дзеці ў сучасным свеце», «Пагаворым аб ВІЧ/СНІДзе», «Добрыя кнігі».

Вельмі цёпла і шчыра гутарыла з клічаўлянамі, што сабраліся ў РДК, паслушніца Галіна. Яна была ўсхвалявана тым, што не існуе больш у нашым раёне акадэмічнага народнага хору. Як знаўца музычнай культуры, чалавек, які скончыў Маскоўскую і Ленінградскую кансерваторыі, матушка Галіна дала высокую адзнаку акадэмічнаму выканальніцкаму майстэрству нашых землякоў і ўручыла кветкі былому кіраўніку хора Раісе Уладзіміраўне Ціхаміравай. Па праўдзе сказаць, вестка аб неіснаванні больш хору для многіх была вельмі нечаканай.

Канцэртная праграма «Беражы сваё сэрца», расказаныя ў ходзе яе прытчы, цудоўныя песні ў выкананні мужчынскага вакальнага ансамбля «Арнамент» узвялічылі нашы душы,прыадчынілі акенца ў духоўную прастору, заставілі задумацца аб выратаванні душы і прызвалі максімальна спасцігаць веліч гарманічнасці існавання ў адзінстве з Прыродай, Духам, іншым Чалавекам.

За чатыры дні фестывалю праваслаўнай культуры «Кладзезь» нашы клічаўляне мелі магчымасць далучыцца да агульначалавечых каштоўнасцей, узбагаціць душу і зразумець сэнс падзей, што адбываюцца ў грамадстве, умацаваць сваё веравызнанне.

Ідэалогія сучаснай Беларусі ў многім заснавана на адраджэнні хрысціянскай духоўнасці. Наш беларускі дом добры і светлы, а тым больш дом царкоўны, у якім шмат паверхаў, дзе павінны ўладарыць духоўная чысціня і свет ісціны.

Хрэсным ходам і падзячнай малітвай завяршыўся фестываль сёлета.

Оставить ответ

:wink: :twisted: :roll: :oops: :mrgreen: :lol: :idea: :evil: :cry: :arrow: :?: :-| :-x :-o :-P :-D :-? :) :( :!: 8-O 8)