Святы пакроў зямельку засцілае

размещено в: Наши новости | 0

Шчодрая зямля Клічаўская на людзей таленавітых, на дары палёў і лясоў. Гэта яшчэ раз прадэманстраваў «Пакроўскі кірмаш», што адбыўся ў мінулую суботу. Ужо з самага ранку на гарадской плошчы ішоў бойкі гандаль. Гаспадары грунтоўна запасаліся на зіму. Толькі прадпрыемствы раённага спажывецкага таварыства выручылі ад продажу аж 8 мільёнаў рублёў. На «ура» пайшлі 3 тоны капусты, рознае фуражнае збожжа, мяса ялавічыны і свініны, паўфабрыкаты з іх, субпрадукты, розная гародніна, а яшчэ духмяныя шашлыкі і іншыя гатовыя прадукты.

Шмат людзей было каля гандлёвага павільёна ААТ «Асіповіцкі малочны камбінат», калгасных і саўгасных машын з сельгаспрадукцыяй, аўтамабіля з жывой рыбай і г. д. А які кірмаш без музыкі, песен, розных гульняў, забаў? Усё гэта з размахам, маляўніча, ад усяго сэрца дарылі жыхарам і гасцям горада работнікі культуры і ўдзельнікі мастацкай самадзейнасці раёна. І не ўстаялі кірмашоўцы перад такім запалам весялосці. У конкурсе частушачніц удзельнічалі, падыспань, кракавяк танцавалі, на веламабілі каталіся, сувеніры на памяць з выстаўпродаж Дома рамёстваў, Цэнтра пазашкольнай работы, цэнтралізаванай бібліятэчнай сістэмы набывалі. Людзі з задавальненнем частаваліся рознай смакатой з выставы «Дары восені», што арганізавалі клубныя ўстановы раёна, і ацэнку ім шляхам галасавання самі давалі. Шчырым, вясёлым, песенным атрымаўся сёлетні Пакроўскі кірмаш  народнае свята, якое на Клічаўшчыне адзначаецца з даўніх часоў. І няхай сёння ў яго новае гучанне, але бацькоўскай спадчыне жыць!

Ніна ІЗОХ

Оставить ответ

:wink: :twisted: :roll: :oops: :mrgreen: :lol: :idea: :evil: :cry: :arrow: :?: :-| :-x :-o :-P :-D :-? :) :( :!: 8-O 8)